لەبەرژەوەندى مامۆستایانى وانەبێژ بڕیارێک دەرکرا

ناوەندی هەواڵ

نوێنەری گشتیی مامۆستایانی گرێبەست ڕایگەیاند، بەشێک لەو وانەبێژانەی لە ماوەی ڕابردوودا بەهەر هۆکارێک دوورخرابوونەوە دەکرێنە گرێبەست.

لەماوەى رابردوودا چەندین جار ئەو مامۆستا وانەبێژانەی بە هۆکاری جیا جیا لە کارکردن دوورخرابوونەوە و لە مافی بەگرێبەستبوون بێبەش ببوون گردبوونەوەیان ئەنجامدا و داوای دامەزراندنیان بە شێوەی گرێبەست کرد.

عەلی رەئوف، نوێنەری گشتیی مامۆستایانی گرێبەست رایگەیاند، لەوەزارەتى پەروەردە نزیکەى دوو هەزار مامۆستای گرێبەست بوونەتە هەمیشەیی و ناویان هاتووەتەوە ئەو وانەبێژانەی بە هۆکاری جیاجیا لادراون لە شوێنیان دادەنرێن.

وتیشى، لە جێگەی ئەو گرێبەستانەی بە هەمیشەیی دامەزراون ئەو مامۆستا وانەبێژانە دەخرێتە شوێنەکانیان کە لە ماوەی ڕابردوو بە هۆکاری نادیار دوورخرابوونەوە، واتە بە گرێبەست دەکرێن.