ڕوسیا گەڕانەوەی 26 منداڵی داعشی لە ڕۆژئاوای كوردستان ڕاگەیاند

ناوەندی هەواڵ

کۆمیساریای مافەکانی منداڵانی ڕوسیا، گەڕانەوەی 16 منداڵی ڕووسی لە کەمپێکی ڕۆژئاوای كوردستان ڕاگەیاند.

ماریا لڤۆڤا بیلۆڤا،کۆمیساریای مافەکانی منداڵانی ڕوسیا لە ناوەڕاستی ئەم مانگەدا ئاشکرای، کار لەسەر گەڕانەوەی ژمارەیەك منداڵ لە سوریاوە دەکات، پێش کۆتایی ئەمساڵ.

بیلۆڤا دوێنێ هەینی بڵاویکردەوە، کە ئەمڕۆ ژمارەیەك منداڵی ڕوسی لە كەمێكی ڕۆژئاوای كوردستان گەڕاونەتەوە وڵات، كە پێكهاتوون لە 14 کوڕ و 12 کچ، و تەمەنیان لە نێوان 5 بۆ 12 ساڵە، و بەم زووانە چاویان بە کەسوکاریان دەکەوێت.

ئاماژەی بەوەشکرد، ئەومنداڵانە پێش ئەوەی چاویان بە کەسوکارەکانیان بكەوێت، لە نەخۆشخانەکانی مۆسکۆ پشکنینی پزیشکییان بۆ دەکرێت و لە سەنتەرەكانی پاڵپشتی خێزان و منداڵان لە مۆسکۆ پەروەردە دەكرێن.

بەپێی ڕاپۆرتی ئاژانسی "تاس"ی ڕوسی، تا ئێستا ڕوسیا 592 منداڵی گەڕاندووەتەوە کە لە دایک و باوکێکی ڕوسی بوون و پەیوەندییان بە ڕێکخراوی تیرۆرستی دەوڵەتی ئیسلامی لەعێراق و شام ناسراو "داعش"ەوە لە سوریا، عێراق، پاکستان و تورکیا کردووە.

منداڵانی ڕوسیا لە ساڵی 2018ەوە بە هاوکاری کۆمیساری مافی منداڵانی ڕوسیا لە ڕۆژهەڵاتی ناوەڕاست دەگەڕێندرێنەوە زێدی خۆیان.