حەوت ئەندامی داعش دەستگیركران؛ پلانێكی تیرۆریستی لە كەركوك شكستیپێدەهێنرێت

ناوەندی هەواڵ

دەزگای ئاسایشی نیشتمانی عێراق ئاشكرای كرد، پلانێكی تیرۆریستییان لە پارێزگای كەركوك شكستپێهێناوە.
بەپێی ڕاگەیەندراوێكی دەزگای ئاسایشی نیشتمانی، لە هەڵمەتێكی جۆری و بە بوونی زانیاریی پێشوەخت و هەواڵگری، پلانێكی تیرۆریستی مەترسیدارمان بۆ بە ئامانجگرتنی شوێنە ئەمنیی و حكومییەكان شكستپێهێنا.
هەر بەپێی ڕاگەیەندراوەكە پلانەكە بە هاوكاری دەزگای ئاسایشی هەرێمی كوردستان و بەدیاریكراوی ئاسایشی سلێمانی جێبەجێكراوە، حەوت ئەندامی داعش دەستگیركراون كە یەكێكیان ئەمیری كوردستانی ڕێكخراوەكە بووە بە ناوی ئازاد شاخی.
لە كاتی پرۆسەی دەستگیركردنی ئەو تیرۆریستانەدا یەكێكیان خۆی تەقاندووەتەوە، دواتریش دەست بەسەر لیستێكدا گیراوە كە ناوی 50 ئەندامی داعشی تێدابووە، جگە لە دەستبەسەرداگرتنی ژمارەیەك چەك و درۆنی تیرۆریستان.