وەزارەتی کارەبا: لە هەر ئەگەرێکدا پێشر ئاگادارتان دەکەینەوە

ئیرادە میدیا

وەزارەتی کارەبای هەرێمی کوردستان لە نوێترین راگەیێندراویدا جەختی لەوە کردەوە کە سەرجەم تواناکانیان خستووەتە گەڕ بۆ کۆنتڕۆڵکردنی دۆخەکە. وەزارەتەکە ڕوونیکردووەتەوە کە لە ئێستادا شانبەشانی وەزارەتی سامانە سرووشتییەکان، هێزە ئەمنییەکان و تیمەکانی کۆمپانیای دانا غاز، هەوڵەکانیان چڕ کردووەتەوە بۆ ئەوەی پرۆسەی بەرهەمهێنان ئاسایی بێتەوە و بە زووترین کات کارەبا بۆ سەرجەم ماڵان، بازاڕ و کارگەکان بگەڕێننەوە.

ئەم پێشهاتانە دوای ئەوە دێن کە شەوی چوارشەممە ٢٦ی تشرینی دووەمی ٢٠٢٥، لە هێرشێکدا کێڵگەی غازی کۆرمۆر لە سنووری چەمچەماڵ کرایە ئامانج. بەهۆی هێرشەکەوە ئاگر لە کۆگایەکی گەورەی کێڵگەکە کەوتەوە و زیانێکی بەرفراوانی لێکەوتەوە، کە کاریگەری راستەوخۆی کردە سەر کەرتی وزە و بووە هۆی کەمبوونەوەی ٨٠٪ی بەرهەمهێنانی کارەبای هەرێمی کوردستان. وەزارەتی کارەبا لە پەیامەکەیدا دووپاتی کردووەتەوە کە سەلامەتی و ئاسوودەیی هاووڵاتییان گەورەترین ئامانجیانە و هەر پێشهاتێکی نوێ ڕووبدات، خەڵکی لێ ئاگادار دەکەنەوە.

لەسەر ئاستی ئەمنی و بەدواداچوون بۆ دۆزینەوەی بکەرانی هێرشەکە، حکومەتی عێراق و هەرێمی کوردستان بە هەماهەنگی دەستیان بە لێکۆڵینەوەی ورد کردووە.
ڕۆژی هەینی ٢٨ی تشرینی دووەم، لیژنەیەکی باڵای ئەمنی بە سەرۆکایەتیی عەبدولئەمیر شەممەری و بە ئەندامێتیی وەزیری ناوخۆی هەرێمی کوردستان و سەرۆکی دەزگای هەواڵگری عێراق، بە پاڵپشتی هێزەکانی هاوپەیمانی نێودەوڵەتی گەیشتنە شوێنی ڕووداوەکە لە کێڵگەی کۆرمۆر.

سەباح نوعمان، وتەبێژی فەرماندەی گشتیی هێزە چەکدارەکانی عێراق ڕایگەیاندووە کە لیژنەکە دەستبەجێ کارەکانی دەستپێکردووە بۆ لێکۆڵینەوە لە چۆنیەتی ئەنجامدانی هێرشەکە.
بەپێی زانیارییەکان، بڕیارە لە ماوەی ٧٢ کاتژمێردا ئەنجامی کۆتایی لێکۆڵینەوەکان دەربکەوێت و وردەکارییەکان بۆ ڕای گشتی ئاشکرا بکرێن.