تره‌مپ یه‌كه‌م هه‌نگاوى نا.. هۆشدارییه‌كى به‌په‌له‌ بڵاوده‌كاته‌وه‌

دۆناڵد ترەمپ سەرۆکی ئەمریکا ڕایگەیاند، ئاسمانی سەر ڤەنزوێلاو دەوروبەری بەتەواوی دادەخرێت، لەكاتێكدا پێشتر هۆشداریی بەهێڵە ئاسمانییە گەورەکان درابوو لە"دۆخێکی مەترسیدار" لەکاتی فڕین بەسەر ڤەنزوێلادا.

دۆناڵد ترەمپ ئەمڕۆ شەممە لەپلاتفۆرمی "Truth Social" بڵاویكردەوە، "بۆ هەمو هێڵە ئاسمانییەکان، فڕۆکەوانان، بازرگانانی ماددە هۆشبەرەکان‌و قاچاخچییانی مرۆڤ، ئەوە لەبەرچاو بگرن کە ئاسمانی ڤەنزوێلاو دەوروبەری بەتەواوی دادەخرێت".

بەپێی ڕۆژنامەی "نیویۆرک تایمز"، ترەمپ هەفتەی ڕابردوو لەگەڵ نیکۆلاس مادورۆ، هاوتا ڤەنزوێلییەکەی قسەیکردووەو گفتوگۆکە باسی لەئەگەری کۆبونەوەیەک کردووە لەئه‌مریكا.

هەروەها هەفتەی ڕابردوو دەزگا ڕێکخەرەکانی ئەمریکا هۆشدارییاندایە هێڵە ئاسمانییە گەورەکان لە"دۆخێکی مەترسیدار" لەکاتی فڕین بەسەر ڤەنزوێلادا بەهۆی "خراپبونی دۆخی ئەمنی‌و زیادبونی چالاکی سەربازیی لەناوخۆ یان دەوروبەری وڵاتەکە".

ئیدارەی ترەمپ فشاری توند دەخاتەسەر ڤەنزوێلا لەڕێگەی کۆکردنەوەی هێزی سەربازی گەورە لەدەریای کاریبی، بەتایبەتی بەجێگیرکردنی گەورەترین کەشتیی فڕۆکەهەڵگری جیهاندا لەناوچەکە، بە"ئامانجی ڕوبەڕوبونەوەی باندەكانی ماددە هۆشبەرەكان".

واشنتن جەخت لەوەدەكاتەوە، ئامانجەکە بەرەنگاربوونەوەی قاچاخچێتی ماددە هۆشبەرەکانە، بەڵام کاراکاس دەڵێت، ئامانجی کۆتایی گۆڕینی ڕژێمە. لەمانگی ئەیلولەوە، هێزەکانی ئەمریکا زیاتر لە 20 بەلەمی گومانلێکراو بەقاچاخچێتی ماددە هۆشبەرەکانیان لەدەریای کاریبی‌و ڕۆژهەڵاتی زەریای هێمن تێکشکاندووە، کە بووەتە هۆی کوژرانی زیاتر لە 83 کەس.