عێراق و هەرێم یاسایەكی هاوبەش بۆ هاتوچۆ دەردەكەن

ناوەندی هەواڵ

عێراق و هەرێمی كوردستان یاسایەكی هاوبەش بۆ هاتووچۆ دەردەكەن، تاوەكو ئێستاش دوو كۆبوونەوەیان كردووە.
بەوتەی بەرپرسانی وەزارەتی ناوخۆی هەرێمی كوردستان، وەزارەتی ناوخۆی هەرێمی كوردستان رەشنووسی پرۆژەیاسایەكی هاتووچۆی ئامادەكردووە و وەزارەتی ناوخۆی عێراق رەشنووسەكەی پێ باشە،  لەسەر بنەمای ئەو رەشنووسە هەردوولا لیژنەیەكیان پێكهێناوە و گفتوگۆ دەكەن. 
تاوەكو ئێستا لیژنەكە دوو كۆبوونەوەی كردووە. یەكێكیان لە بەغدا و ئەوی دیكە لە هەولێر. 
عێراق و هەرێمی كوردستان دوو یاسای هاتووچۆی تایبەت بە خۆیان هەیە؛ عێراق یاسای ژمارە هەشتی ساڵی 2019ی هاتووچۆی هەیە؛ هەرێمی كوردستانیش یاسای ژمارە 86ی ساڵی 2004.
دوای رێككەوتنی هەردوولا، حكومەتی عێراق رەشنووسەكە رەوانەی پەرلەمان دەكات بۆ ئەوەی پەسندبكرێت و ئەوكاتە دەبێتە یاسایەكی هاوبەشی فیدراڵی لە تەواوی عێراق بە هەرێمی كوردستانەوە جێبەجێ دەكرێت و هەموو رێنماییەكانی تێدا یەكدەخرێت، بە سزای سەرپێچی هاتووچۆشەوە.
بەپێی ئامارێكی وەزارەتی پلاندانانی عێراق، لە عێراق زیاتر لە حەوت ملیۆن ئۆتۆمبێلی تۆماركراو هەن. لە هەرێمی كوردستانیش زیاتر لە دوو ملیۆن ئۆتۆمبێل بە فەرمی تۆماركراون.