فەرمانی لەسێدارەدان بۆ بکوژی کوڕەکەی وەستا حەسەنی کەبابچی دەرچوو

ناوەندی هەواڵ

دادگای تاوانەکانی سلێمانی، فەرمانی لەسێدارەدانی بۆ بکوژی کوڕەکەی وەستا حەسەنی کەبابچی دەرکرد، کە دوو ساڵ لەمەوبەر لە رووداوێکی تەقەکردندا کوژرا.

شادمان ئەبوبەکر، دایکی کوژراوەکە کە هاوکات هاوسەری وەستا حەسەنی کەبابچییە ڕایگەیاند، ئەمڕۆ 13ی ئایاری 2025، دادگای تاوانەکانی سلێمانی فەرمانی لەسێدارەدانی بۆ بکوژی براکەی دەرکردووە لەپاش ئەوەی ساڵیک و نۆ مانگی لە زینداندا بەڕێکردووە.

رووداوەکە بەجۆرێک بوو، "لە پاش گیانلەدەستدانی وەستا حەسەنی کەبابچی لە مانگی ئابی 2023، دوو کوڕی وەستا حەسەنی کەبابچی، لە 28ی ئەیلولی 2023 لە گەڕەکی سەرچناری سلێمانی دەستڕێژی گوللـەیان لێکراو بەهۆیەوە رۆژ حەسەنی 21ساڵ  گیانیلەدەستدا و برایەکی دیکەشی بەناوی دیلان بریندارکرا.

پێشتر، هاوسەرەکەی وەستا حەسەنی کەبابچیی، رایگەیاند، ئەوان هەڕەشەیان لەسەرە و رێگە نادرێت لە دادگا بڕیاری کۆتایی بۆ تاوانبار دەربچێت، چونکە باوکی پلەداری سەربازییە.

دایکی کوژراوەکە ئاماژەی بەوەشکرد، کەسوکاری کوژراو هەڕەشەیان کردووە لەوەی دەبێت بە سوڵحی عەشایەری دۆسییەکە چارەسەر بکرێت، بەڵام ئەوان سووربوون لەسەر چارەسەرکردنی دۆسیەکە بە یاسایی.

کلیک بکە بۆ بینینی کۆنگرەی ڕۆژنامەوانی شادمان ئەبوبەکر، دایکی کوژراوەکە