ئەو سەرۆكەى رۆژێك پێش مردنى وتارێكى نوسى و تەنها خۆى بینى

عەبدولکەریم قاسم (21ی تشرینی دوەمی 1914- 9ی شوباتی 1963)، ناوی تەواوی عەبدولکەریم قاسم محمـد بەکر عوسمان ئەلزوبەیدییە، ئەفسەرێکی سەربازی و سەرۆکوەزیرانی پێشوترى عێراق، و فەرماندەی گشتی هێزە چەکدارەکانی عێراق بو، لە ماوەى ساڵانى حوكمڕانییەكەیدا (1958 تا 1963)  وەزیری بەرگری بوە بە وەکالەت و بە یەکەم فەرمانڕەوای عێراق دادەنرێت لە دوای دەسەڵاتی پاشایەتی، و یەکێکە لە سەرکردەکانی شۆڕشی 14ی تەمموز.

لە روانگەی سیاسییەوە سەردەمى پاشایەتی سەردەمى گێژاوی سیاسی و شەڕی لایەنەکان لە نێوان خۆیاندا بوە لەسەر دەسەڵات، لەگەڵ ئەوەشدا زۆر دەستکەوت و گۆڕانکاريی سیاسی ریشەیی هاتەدى، بەڵام قاسم هات سیستەمی حكومڕانى لە پاشایەتییەوە گۆڕى بۆ کۆماری و زۆربەی فەرمانە سەعیدییەکانى هەڵوەشاندەوە (كەلێرەدا مەبەست لە فەرمانەكانى نورى سەعید-ى سەرۆكوەزیرانى سەردەمى پاشایەتییە).

لەدواى كودەتاكەى عەبدولكەریم قاسم، دەستبەسەر و زیندانە سیاسییەكان ئازادکران، بڕیارەکانی لێسەندنەوەی رەگەزنامەی عێراقییش هەڵوەشێندرانەوەو رێ بە ئازادییە گشتییەکان و چالاکییە حزبییەکان درا و بەڵێن بە رەمزە دیارەكانى بزوتنەوەى مایسى 1941 بەسەركردایەتى "رەشید عالى گەیلانى" درا كە جوڵانەوەكەیان وەك بزوتنەوەیەكى ئازادیخوازى نيشتمانیى بناسێنێت.

پەیوەندی دۆستایەتی و سۆز و خۆشەویستی نێوان فەریق عەبدولکەریم قاسم و عەقید عەبدولسەلام عارف درێژدەبێتەوە بۆ ساڵی 1938، کاتێك عارف لە کۆلێژی سەربازی چاوی بە قاسم کەوت.

دوای دەرچونی عەبدولسەلام لە کۆلێژی سەربازی بەسرە و دوای گواستنەوەی بەهۆی بەشداریکردنی لە شۆڕشی رەشید عالی گەیلانى، لە یەکێک لە یەکە سەربازییەکانى بەسرە؛ لەگەڵ قاسم یەكتریان بینى و لەكاتی کۆبونەوەکەیاندا باسی بارودۆخى خراپى عێراقییەكانیان لەسایەى حوكمڕانى و سیاسەتى "نورى سەعید"دا دەكرد.

دواى كۆتاییهاتنى پێنچ ساڵەكەى حوكمڕانى قاسم لەساڵى 1963، و پاش خیانەتى "عەبدولسەلام عارف"ى هاوڕێى نزیكى، قاسم وتارێكى تەلەفزیۆنيى بۆ سەرجەم گەلانى عێراق تۆماركردو تێیدا وتبوى: رۆڵەكانى گەل: سەرکەوتن لای ئێمەیە، ئێمەش بڕیارمان داوە کۆلۆنیالیزم و یاریدەدەرەکانی لەت لەت بکەین، بۆیە گرنگی بە خیانەتکاران و زاڵمان مەدەن.

ئەوەى جێى سەرنجە ئەم وتارە تەنها خۆى بینى و گوێى لێگرت و خوێندییەوە، چونكە كاتێك عەبدولسەلام و هاوڕێكانى دەسەڵاتى قاسمیان روخاند، بەپەلە چونە بارەگاى تەلەفزیۆن و دەستیان گرت بەسەر هەمو كاسێت و ئەرشیف و بەڵگەنامەكاندا.

دواجار، خیانەتى عەبدولسەلام بەرانبەر بە قاسم، لە خانەى ناشرینترین هاوڕێیەتى سیاسى لە عێراق دا پۆلێن دەكرێت.