روفاتى 22 قوربانى ئێزدى لە شەنگال بە خاك دەسپێردرێن

پاش ئەوەى دوێنى 12ی ئاب، ڕوفاتى 22 قوربانی ئێزدى، کە لەساتەوەختى كەوتنى شارى موسڵ و هێرشكردنە سەر شەنگال بە دەستى گروپە تیرۆریستییەكانى داعش شەهیدکرابون، گەڕێنرانەوە بۆ زێدى خۆیان، بڕیارە ئەمڕۆ لە مەراسیمێكى شایستەدا روفاتەكان ئەسپەردە بكرێن.

بەگوێرەى زانیاریییەكانى ئیرادە، هەر دوێنێ لە بەغداد كارى پشکنینى DNA بۆ ڕوفاتى ئەو 22 هاوڵاتییە ئێزیدییە  تەواوكرابون و دواتریش ئەنجامەكانیان رەوانەى بەشی پزیشکى دادیى موسڵ كران و ڕێکارى یاساییان بۆ ئەنجامدرا.

هەر بە گوێرەى ئەو داتایانەى بەردەستى ئیرادە كەوتون، تا ئێستا بە حەوت قۆناغ روفاتى 296 هاوڵاتى ئێزدى لەبەغداوە گەڕێنراونەتەوە بۆ زێدى خۆیان و هاوكات 500 روفاتى تریش ماون كە لە ئێستادا پشكنینەكانیان تەواو نەبوەو دواى راگەیاندنى ئەنجامەكان ئەوانیش بۆ بەخاك سپاردن رەوانەى شەنگال دەكرێنەوە.

ئیرادە، ئەوەشى زانیوە كە قوربانییەكانى نێو ئەو 22 روفاتە، زۆرینەیان خەڵكى گوندى "كۆجۆ"ن و چواریان لە رەگەزى "مێ"ن.