لەهەنگاوێكى ئەمنیى دا؛ ئێران 21 هەزار كەس دەستگیردەكات

سەعید مونتەزیر ئەلمەهدی وتەبێژی پۆلیسی ئێران ڕایگەیاند، لەمیانی جەنگی ئەمدواییەى وڵاتەكەى دا لەگەڵ ئیسرائیل نزیکەی 21 هەزار گومانلێکراویان دەستگیرکردوە.

بەوتەی مونتەزیر ئەلمەهدی، پاش گورزە ئاسمانییەکانی ئیسرائیل، هێزە ئەمنییەکانی ئێران دەستیان بەهەڵمەتێکی بەرفراوان کردوە كە خۆى لەبڵاوبونەوەی چڕی خاڵەکانی پشکنینى شەقامەكان دا دەبینێتەوە.

هاوكات، بەپشتبەستن بەئاگادارکردنەوەی گشتیی، داوا لەهاوڵاتییان کراوە هەر تاکێک بەگوماناویی هەڵسوکەوت بکات ڕاپۆرتی لەسەربدەن، ئەمەش بوە هۆی بەرزبونەوەى رێژەى دەستگیركراوانى هەڵمەتەكە بە بڕى 41%، كە زۆرینەیان بەهۆى راپۆرت لێدانى خەڵكەوە بوە.

ناوبراو لە درێژەى لێدوانەكەى دا بۆ میدیاكانى ناوخۆى ئێران، باسی لەوەشکردوە، كە لەم ماوەیەدا 262 کەسی گومانلێکراوی سیخوڕ و 172 کەسی تۆمەتبار بە وێنەگرتنی بێ مۆڵەت دەستگیرکراون، هەروەها 30 حاڵەتی ئەمنی تایبەت لەڕێگەی پشکنینی ئەو تەلەفۆنانەی لە تۆمەتباران وەرگیراون، دەستنیشانکراون.