كرماشان چاوى لە گەشتیارانى هەرێم و پارێزگاكانى عێراقە

بەهرام سولەیمانی، جێگری کاروباری سیاسی و ئەمنیەتی پارێزگای کرماشان، پشتیوانیی دەسەڵاتی خۆجێیی بۆ پەرەپێدانی ئاڵوگۆڕی گەشتیاریی لەگەڵ هەرێم و عێراق دوپاتکردەوە.

سولەیمانی لە میانی دیدارێکی لەگەڵ چالاکانی گەشتیاریی لە کرماشان و بەڕێوەبەرانی نوسینگەكانى خزمەتگوزاریی گەشتیاریی عێراق وتی: پەیوەندییە لەمێژینە و ڕەگداکوتاوەکانی نێوان گەلانی ئێران و عێراق بناغەیەکی تۆکمەی بۆ پەرەپێدانی هاوکارییەکان لە هەمو بوارەکاندا بە تایبەت گەشتیاريی ڕەخساندوە.

جێگری کاروباری سیاسی و ئەمنیەتی پارێزگای کرماشان ئاماژەی بەوەشکرد، هەڵکەوتەی پارێزگاکە لە تەنیشت سنورى هاوبەشى هەرێم و عێراق ڕۆڵێکی سەرەکیی پێدەبەخشێت لەم ئاڵوگۆڕانەدا، هاوكات ئەوەشى خستەڕو كە کرماشان نوێنەرایەتی مۆزەخانەیەکی زیندو لە شارستانییەتە کۆنەکان دەکات؛ بە شوێنەوارە هەزاران ساڵەکانییەوە، لەوانە، نەخش و هەڵكۆڵدراو و نوسراوەکانی بێستون تا دیوارەكانى تاقى بوستان.

ئەو بەرپرسە ئێرانییە لە كۆبونەوەكەدا ئاماژەی بە فرەچەشنەیی سەروەت و سامانی گەشتیاریی کرماشان کرد، بەتایبەتى؛ دیمەنى شاخاوی و ئەشکەوت و تاڤگەكانى، تا دەگاتە ڕەنگی ناوازەی چوار وەرزی کرماشان، و میوانداریی دانیشتوانی شارەكە و خواردنە ناوخۆییەکان.

هاوكات، ناوبراو ئەوەشى رونكردەوە كە گەشتوگوزاری ئایینی لە شارەكەدا بە سەرچاوەیەکی گرنگی داهات دەزانرێت، ئەوەش بە لەبەرچاوگرتنی هاوبەشیی نێوان هەردو گەلى ئێران و عێراق، جگە لە توانای پارێزگاکە لە بواری گەشتیاریی تەندروستیى دا، كە بەهۆی بونى ناوەندە پزیشکییە پێشکەوتوەکانی و پزیشکە پسپۆڕەکانییەوە، خەڵكێكى زۆر بۆ چارەسەرى نەخۆشى سەردانى شارەكە دەكەن.

بەهرام سولەیمانی لە کۆتایی قسەكانى دا وتیشى: ئێمە ئامادەین گەشتی هاوبەش ڕێکبخەین و پاکێجی گەشتیاریی سەرنجڕاکێش پێشکەش بکەین و وەبەرهێنانی هاوبەش لەگەڵ هەرێم و عێراق بەرەوپێش ببەین، ئەمەش بە ئامانجی دڵنیابون لەوەی کرماشان وەک شوێنێکی بەناوبانگ و هەمیشەیی بۆ گەشتیارانی عێراقی بمێنێتەوە، لەبەرئەوە هاوڵاتییانی هەرێم و عێراق دەتوانن سودمەندبن لە خزمەتگوزارییە پزیشکییە کوالیتی بەرزەکان بە نرخێکی گونجاو، ئەمە جگە لەوەی چێژ لە دیمەنە سروشتی و مێژوییەکان وەردەگرن، هاوكات ژێرخانی کرماشان گەشەی خێرای بەخۆیەوە بینیوە، لە هۆتێلە لوکسەکانەوە بۆ چێشتخانە بەناوبانگەكان و شوێنە گەشتیارییەكان،  کە بژاردەی جۆراوجۆر بۆ گەشتیارانی بیانی دابین دەكەن.