بڕیار له‌ 100 هه‌زار دیناره‌كه‌ ده‌درێت.. خانه‌نشینى هه‌رێم چۆن وه‌ریده‌گرن؟

سوودانی ڕەزامەندی لەسەر خەرجکردنی دەرماڵەی خانەنشینان دەدات‌و تەرخانی دارایی بۆ کراوە، ماوەتەوە سەرئەوەی وەزارەتی دارایی عێراق ڕێککاری پێویست بۆ خەرجکردنی پارەکە بگرێتەبەر.

لەساڵی 2022 حکومەتەکەی مستەفا کازمی بڕیاریدا بڕی 100 هەزار دینار، بۆ ئەو خانەنشینانە خەرجبکات کە مووچەکەیان لەملیۆنێک دینار کەمترە.

دەیان هەزار کەس سوودمەند دەبن، ئەمە لەکاتێکدایە لەمانگی یەکی ئەمساڵەوە خانەنشینانی عێراق ئەو دەرماڵەیە وەردەگرن، بەڵام ئەوەی هەرێمی کوردستان نەنێردراوە.

سەرچاوەیەک لەئەنجوومەنی وەزیرانی عێراق ئاشكرایكردووه‌، "سوودانی ڕەزامەندی لەسەر خەرجکردنی ئەو دەرماڵەیە داوەو تەرخانی داراییشی بۆ کراوە، تەنها ماوەتەوە سەرئەوەی وەزارەتی دارایی عێراق ڕێککارەکانی دیکەی خەرجکردنی جێبەجێ بکات‌و پارەکە بنێردرێت".

بەڕێوەبەرایەتیی گشتیی خانەنشینی هەرێم هەموو ڕێککارەکانی تەواوکردووەو لەئەگەری خەرجکردنی پارەکە دەبێت تەواوی مانگەکانی ئەمساڵ قەرەبوو بکرێنەوە، واتا ئەگەر لەگەڵ مووچەی مانگی نۆ خەرجبکرێت ئەوا هەر خانەنشینێک 900 هەزار دینار جگە لەمووچەکەی خۆی بۆ خەرجدەکرێت.