ژیانی ساڵح موسلیم؛ ئەو سەركردە كوردەی لە سەرەمەرگیشدا ژیانی كەسێكی دیكەی نەخستە مەترسییەوە

ئامادەبوو چڵی زەیتوون بخوات بەڵام رۆژئاوا رادەست نەكات

ناوەندی هەواڵ

ساڵح موسلیم كە ناسراوە بە بابی وەڵات شەوی 11 ی ئازاری 2026 لە هەولێر بە نەخۆشی كۆچی دواییی كرد.

یەكێكە لە كەسایەتی و شۆڕشگێڕە دیارەكانی بزووتنەوەی سیاسیی كورد 

ساڵح موسلیم، ناسراو بە ئەبو وڵات، یەكێكە لە كەسایەتی و شۆڕشگێڕە دیارەكانی بزووتنەوەی سیاسیی كورد لە ڕۆژاوای كوردستان. لە ساڵی 1951 لە گوندی شێرانی سەر بە كۆبانێ لەدایكبووە.

قۆناغەكانی خوێندنی سەرەتایی و ناوەندی لە سوریا تەواو كردووە، پاشان بڕوانامەی ئەندازیاری كیمیایی لە زانكۆی ئیستەنبوڵ بەدەست هێناوە. 

لە ساڵانی 1978 بۆ 1990، وەك ئەندازیار لە سعودیە كاری كردووە.

ساڵی 1990، ساڵح موسلیم دەستی بە چالاكیی سیاسی كرد

ساڵی 1990، ساڵح موسلیم دەستی بە چالاكیی سیاسی كرد. لە ماوەی چالاكییەكانیدا، چەندین جار لەلایەن ڕژێمی بەعسی سووریاوە دەستگیر كراوە. 

لە ساڵی 1998 بووە ئەندامی مەكتەبی سیاسیی گردبوونەوەی نیشتمانیی دیموكرات.

ساڵح موسلیم یەكێك بووە لە ئەندامانی دەستەی دامەزرێنەرانی پارتی یەكێتیی دیموكرات (پەیەدە).

لە ساڵانی 2010 تا 2017، وەك هاوسەرۆكی پەیەدە ڕۆڵێكی بەرچاوی گێڕاوە.

دووبارە لە ساڵی 2022، بۆ جاری سێیەم وەك هاوسەرۆكی پەیەدە هەڵبژێردرایەوە، كە ئەمەش نیشانەی متمانەی زۆری حیزبەكەی بوو پێی .

لە 2018، لەسەر داوای توركیا لە وڵاتی چیك  دەستگیر كرا

لە ڕێكەوتی 25ی شوباتی 2018، لەسەر داوای توركیا لە وڵاتی چیك و لە شاری پراگ دەستگیر كرا. بەڵام دوای دوو ڕۆژ، لە 27ی شوباتی 2018، پاش ئامادەبوونی لە بەردەم دادگای چیك، ئازاد كرا.

جگە لە پۆست و بەرپرسیاریەتیەكانی لە  پارتی یەكێتی دیموكرات "پەیەدە" ، ساڵح موسلیم ئەندامی كۆنگرەی نەتەوەیی كوردستان (كەنەكە) بووە .دوایین پۆستیشی ئەندامی دەستەی سەرۆكایەتیی پەیەدە بووە.

هەڵوێستە سیاسییەكانی ساڵح موسلیم جێی سەرنجن، لەكاتی گەمارۆی سەر ڕۆژئاوا وتی " توێكڵی دار ، چڵی زەیتونەكانمان دەخۆین و ڕۆژئاوا تەسلیم ناكەین ".

پەیەدە: جێپەنجەیەكی گەورەی لە مێژووی پارتەكەمان و بزووتنەوەی نەتەوەیی كورددا بەجێهێشت

بەبۆنەی كۆچی دوایی ساڵح موسلیمەوە پەیەدە دەڵێت جێپەنجەیەكی گەورەی لە مێژووی پارتەكەمان و بزووتنەوەی نەتەوەیی كورددا بەجێهێشت. ناوی لە یادەوەریی هەڤاڵان و گەلەكەیدا وەك نموونەی فیداكاریی، تێكۆشان و قوربانییدان بۆ ئەو دۆزەی كە باوەڕی پێی هەبوو، دەمێنێتەوە.

ئەم بەرپرسەی پێشووی پەیەدە بۆ ماوەی چەند ڕۆژێك لەژێر چاودێری پزیشكیدا بوو، بەڵام بەهۆی سەختی نەخۆشییەكەیەوە گیانی لەدەستدا. كەسێكی نزیكی ساڵح موسلیم دەڵێت ناوبراو گورچیلەكانی سست ببوو، بەڵام پێشنیاری گۆڕینی گورچیلەی ڕەتكردبووەوە بۆ ئەوەی تەندروستی كەسی دیكە نەخاتە مەترسییەوە.