پەیامی نوێی ئۆجەلان سەبارەت بە داهاتووی شنگال، کۆتاییهاتنی ئەرکی مێژوویی پەکەکە و پرۆسەی ئاشتی لە تورکیا

عەبدوڵڵا ئۆجەلان، ڕێبەری زیندانیکراوی پارتی کرێکارانی کوردستان (پەکەکە)، لە چەند پەیامێکی جیادا کە یەکێکیان ئاراستەی کۆمەڵگەی ئێزدی و ئەوی تریشیان ئاراستەی کۆنفرانسی "ئاشتی و ئێنتێگراسیۆنی دیموکراتیک" لە لەندەن کراوە، هەڵوێستی خۆی لەسەر دواین پێشهاتە سیاسی و ئەمنییەکانی ناوچەکە، پرسی شنگال، و کۆتاییهاتنی قۆناغی چەکداریی پەکەکە خستە ڕوو.

پاراستنی جەوهەری و مانەوەی یەبەشە لە شنگال

ئۆجەلان لە پەیامەکەیدا بۆ کۆمەڵگەی ئێزدی جەختی لەوە کردەوە، سەرەڕای دەستدرێژییەکانی داعش، ژنانی ئێزدی خاوەن هەڵوێستێکی بەهێزن و دەبێت کولتووری ئێزدی بە تەنها ئازادی بەدەست نەهێنێت، بەڵکو هۆشداری دا ئەگەر هێرش بکرێتە سەر ئێزدییەکان، بە چەکداریی خۆیان دەیانپارێزین و قورسایی دەدرێتە ئۆتۆنۆمیی ئەو ناوچەیە. ناوبراو بە توندی جەختی کردەوە دەبێت یەبەشە لە شنگال بمێنێتەوە و لەناو سوپای عێراقدا شوێنی خۆی بگرێت، چونکە بە وتەی ئەو ئەگەر ئەمە ڕوونەدات، نە بارزانی و نە نەتەوەپەرستیی عەرەب مافی ژیانیان پێ نادەن و گەلی ئێزدی لە قۆناغی جینۆسایددا دەژی کە پێویستی بە ئاسایشی خۆجێیی و پاراستنی جەوهەری هەیە.

سەبارەت بە هەوڵەکانیش، ئاماژەی بەوە دا که سەرەڕای ئامادەکردنی بەڵگەنامەی ڕێککەوتن لە نێوان یەبەشە و حکومەتی عێراقدا، بەڵام هێشتا لەلایەن سەرۆکوەزیرانەوە ئیمزا نەکراوە و تورکیاش هەوڵی ڕێگریکردنی دەدات، لە کاتێکدا ئێزدییەکان داوای دیموکراسیی خۆجێیی دەکەن نەک ناوچەیەکی سەربەخۆی جیاواز.

کۆتاییهاتنی ئەرکی مێژوویی پەکەکە و پرۆسەی ئاشتی

لە تەوەرێکی تری پەیامەکەیدا کە ئاراستەی کۆنفرانسی لەندەن کرابوو، ئۆجەلان جەختی لەوە کردەوە، بانگەوازەکەی ٢٧ی شوباتی ٢٠٢٥ دەرگای قۆناغێکی نوێی کردووەتەوە و لە جیهانی ئێستادا ئەرکی مێژوویی پەکەکە کۆتایی هاتووە. ناوبراو ڕایگەیاند خۆی بڕیاری کۆتاییهێنان بە پەکەکەی داوە، چونکە لەبەردەم چارەسەرییەکاندا ببووە ئاستەنگ و پێویستە بگۆڕدرێت بۆ شێوازێکی نوێی تێکۆشان کە تێیدا سیاسەتی دیموکراتیک جێگەی ستراتیژیی شەڕی گرتووەتەوە، بە جۆرێک کە ئامانج دابەشبوون نەبێت بەڵکو پێکەوەبونیادنانی دیموکراسیی ڕاستەقینە بێت.

ئەم پەیامانەی ئۆجەلان هاوکاتە لەگەڵ کۆبوونەوەی فەرمیی دەستەی تایبەت بە هەماهەنگی و بەدواداچونی پرۆسەی ئاشتی لە ئەنقەرە بە سەرۆکایەتیی جەودەت یەڵماز، جێگری سەرۆک کۆماری تورکیا، کە تێیدا هەنگاوەکانی جێبەجێکردنی پرۆسەکە بەسەر قۆناغی چەکدانان، هەڵوەشاندنەوەی پێکهاتە ڕێکخراوەییەکان و قۆناغی یاسایی و چاودێریدا دابەش کراوە.