ئەمریکا گەورەترین بنکەی سەربازیی لەغەززە دروستدەکات

بەپێی راپۆرتێکی رۆژنامەی "یەدیعۆت ئەحرۆنۆت"ی عیبری، ئەمریکا پلانی هەیە یەکێک لە گەورەترین بنکە سەربازییەکانی خۆی لە ڕۆژهەڵاتی ناوەڕاست لە ناوچەی پشتێنەی غەززە (دەوروبەری کەرتی غەززە) دابمەزرێنێت. ئەمەش وەک هەنگاوێکی ستراتیژیی و بەشێک لە ئامادەکارییەکان بۆ قۆناغی دوای کۆتایی هاتنی جەنگ.

راپۆرتەکە ئاماژەی بەوەکردووە، تێچووی سەرەتایی ئەم پڕۆژەیە بە نزیکەی نیو ملیار دۆلار (500 ملیۆن دۆلاری ئەمریکی) خەمڵێنراوە. بنکەکە بە جۆرێک دیزاین کراوە کە توانای لەخۆگرتنی چەند هەزار سەربازێکی هەبێت لە یەک کاتدا، کە ئەمەش ئاماژە بە فراوانی و گرنگیی پێگەکە دەدات.

سەرەکیترین ئامانجی ئەم بنکەیە ئەوەیە ببێتە ناوەندێک بۆ جێگیرکردنی ئەو هێزە نێودەوڵەتییە فرە-نەتەوەییەی کە بڕیارە ڕۆڵی سەرەکیی بگێڕێت لە چاودێریکردنی ڕێککەوتنەکانی ئاگربەست و بەڕێوەبردنی ئاسایش لە کەرتی غەززە دوای کۆتاییهاتنی ئۆپەراسیۆنە سەربازییەکان. ئەم هێزە چاوەڕوان دەکرێت بۆ ماوەیەکی کاتی لەوێ بمێنێتەوە.

ئەوەش هاتووە: لە چەند هەفتەی ڕابردوودا، لایەنی ئەمریکی دەستی کردووە بە زنجیرەیەک گفتوگۆی نهێنی و هەماهەنگیی چڕوپڕ لەگەڵ بەرپرسانی باڵای حکومەتی ئیسرائیل و سوپای ئیسرائیل  بۆ دانانی وردەکارییەکانی پڕۆژەکە و دیاریکردنی شوێنی کۆتایی بنکەکە.

ڕاپۆرتە ئەمنییە ئیسرائیلییەکان ئاماژە بەوە دەدەن کە ئەم هەنگاوەی ئەمریکا بەڵگەیەکە لەسەر بەشداریی ڕاستەوخۆ و درێژخایەنی واشنتۆن لە داهاتووی ئەمنی ناوچەکە.

سەرەڕای گرنگیی ستراتیژیی پڕۆژەکە، بەڵام چەندین سەرچاوە ئاماژە بەوە دەدەن کە ئەگەری هەیە دروستکردنی بنکەیەکی سەربازیی ئەمریکا لەم ناوچەیە ببێتە خاڵێکی هەستیاری نوێ لە ململانێی ئیسرائیل و فەڵەستین و کاردانەوەی لایەنە ڕکابەرەکانی لێبکەوێتەوە.