نوێژه‌ بارانه‌ ده‌ستپێده‌كات‌و مه‌ترسى چۆڵكردنى یه‌كێك له‌پایته‌خته‌كانى وڵاتانیش هه‌یه‌

بەشێك لەوڵاتانی عەرەبی‌و ئیسلامی داوایان لەهاووڵاتییانیان كردووە نوێژەبارانە ئەنجامبدەن بەهۆی دواكەوتنی وەرزی بارانبارین‌و مەترسی وشكەساڵی لەوڵاتاكانیان.

هەریەك لەوڵاتانی سعوودییە، قەتەر، سووریاو ئێران داوایان لەهاووڵاتییان كردووە لەكاتێكی دیاریكراوداو بەكۆمەڵ نوێژەبارانە ئەنجامبدەن‌و لەخودا بپاڕێنەوە لێیان خۆشبێت‌و بارانی ڕەحمەتیان بەسەردا ببارێنێت.

سەلمان بن عەبدولعەزیز شای سعوودییە داوای لەهاووڵاتییانی وڵاتەكەی كرد بۆ سبەینێ پێنجشەممە نوێژەبارانە ئەنجامبدەن، وەزارەتی ئەوقافی سووریاش داوای لەهاووڵاتییان كردووە هەوڵبدەن سێ ڕۆژ بەڕۆژوو ببن‌و هەروەها ڕۆژی هەینی داهاتوو لەسەرجەم پارێزگاكان بەكۆمەڵ نوێژەبارانە ئەنجامبدەن.

تەمیم بن حەمەد ئال سانی میری قەتەڕ داوای لەقەتەڕییەكان كرد سبەی پێنجشەممە لەسەرجەم ناوچەكانی وڵاتەكەی نوێژەبارانە ئەنجامبدەن‌و داوا لەخوادای گەورە بكەن بارانی بەڕەحمەتیان بەسەردا ببارێنێت.

میری قەتەڕ هەروەها خۆی سەرلەبەیانی سبەی پێنجشەممە لە مزگەوتی لوسێل نوێژەبارانە ئەنجامدەدات.

لای خۆیشییەوە مەسعوود پزیشكیان سەرۆك كۆماری ئێران ئاماژەی بەوەداوە، ئەگەر تا كۆتایی ئەم مانگە باران نەبارێت، ناچاردەبن بەشێك لەتاران چۆڵبكەن، بەردەوامیش داوا لەهاووڵاتییان دەكات ڕێژەی بەكارهێنانی ئاو كەمبكەنەوە بەتایبەت لەتارانی پایتەخت.