2024-07-23
774 جار خوێنراوەتەوە
ڕۆژئاوای کوردستان لەبارەی لەشکرکێشییەکانی تورکیا هۆشداری دەداتە دەسەڵاتدارانی هەرێم و عێراق
ناوەندی هەواڵ
34 پارتى سیاسی و ڕێکخراوى کۆمەڵگەی مەدەنی ڕۆژئاواى کوردستان لەڕاگەیەندراوێکدا ڕایدەگەیەنن، دەوڵەتی تورکیا بە پێی عەقڵیەتی عوسمانی درێژە بە هێرشەکانی بۆ سەر کورد و عەرەب و ئاشووری و پێکهاتەکانی تری سوریا و عێراق دەدات.
دەشڵێن، دەوڵەتی تورکیا لەسەر کۆمەڵکوژی دژی گەلان و پێکهاتەکان دامەزراوە و تا ئەمڕۆش بە هەمان عەقڵیەتی شۆڤێنیزم و کوشتن و تۆقاندن و گۆشەگیری بەردەوامە.
هەروەها باس لە هێرشە داگیرکەرییەکان بۆ سەر هەرێمی باکور و ڕۆژهەڵاتی سوریا، داگیرکردنی عەفرین، سەرێکانی و گرێ سپی، سیاسەتەکانی کۆچ و گۆڕینی دیمۆگرافیا و هەڕەشەکانی داگیرکردن و لکاندنی ناوچەکانی دیکەش کراوە.
دەربارەی باشووری کوردستانیش دەڵێن: ماوەی ڕابردوو دەوڵەتی تورکیا هێرشێکی گەورەی دەستپێکرد، بە سەدان تانک و هەزاران سەرباز و بەکرێگیراو لە ناوچە داگیرکراوەکانی سوریا بەشدارییان لە شەڕ لە هەرێمی کوردستان کرد،ئەوەش بە هاوکاریی لەگەڵ بەشێک لە لایەنە کوردستانییەکان، بە هەماهەنگی بەغدا و بێدەنگی حکومەتی عێراقە.
دەشڵێن، ئێمە وەک نوێنەری حیزبەکان، ڕێکخراوەکانی کۆمەڵگەی مەدەنی، ئەکادیمیستەکان، سیاسەتمەداران، ڕۆشنبیران، ڕۆژنامەنووسان، خەڵکان و هەموو کۆمەڵگا، هێرشی سیستماتیک شەرمەزار دەکەین.
هاوکات داواش لە حکومەتی بەغدا و هێزە نیشتمانییەکانی عێراق دەکەن بەرپرسیارێتی مرۆیی و ئەخلاقی و یاسایی و سەروەری خۆیان لە بەرامبەر پێشێلکاری و تاوانەکانی دژ بە مرۆڤایەتی و لەناوبردنی سروشت جێبەجێ بکەن و پێشێلکارییە بەردەوامەکانی تورکیا ڕابگرن.
لەڕاگەیەندراوەکەدا هاتووە، پێویستە کۆمەڵگەی نێودەوڵەتی و دامەزراوە پەیوەندیدارەکانی هەموو ڕێوشوێنی پێویست بگرنەبەر و هێرشە دڕندانەو داگیرکارییەکان ڕابگرن و سەروەری و پێکهاتەکانی عێراق بپارێزن. هەروەها ئاماژەیان بەوەشکردووە، ئێمە پشتیوانی خۆمان بۆ گەلی عێراق دەردەبڕین دژی کردەوەکانی دەوڵەتی داگیرکەری تورکیا.
ئەو پارت و ڕێکخراوانەی ڕۆژئاوا داوا لە کۆمکاری عەرەبی و هەموو دەوڵەتانی عەرەبی دەکەن، هەروەها داوا لە هەموو هێزە نیشتمانییەکان و دامەزراوە یاسایی و دیپلۆماسییەکان دەکەن، بێدەنگ نەبن، دەنگی خۆیان بەرز بکەنەوە، لە بەرامبەر داگیرکارییەکانی تورکیا لە باکووری عێراق و باکووری سووریا و دەستێوەردانەکانی لەو دەوڵەتانە عەرەب بەرپرسیارێتی دەگرنە ئەستۆ.
ڕایدەگەیەنن اگیرکردنی وڵاتێکی وەک عێراق یان وڵاتێکی دیکەی ناوچەکە بە واتای داگیرکردنی تەواوی ناوچەکە دێت لە هەمان کاتدا ئاسایشی هەر وڵاتێک بە مانای ئاسایشی هەموو خەڵکی ناوچەکە دێت.
|