“کورد لەئێستادا دەبێ چی بکەن؟”

ناوچەکە لەکۆتای شەڕێکی درێژخایەن و پڕ کوشت و بڕ نزیکدەبێتەوە، دوای کەوتنی بەعس یان باشترە بڵێین ناسیونالیزمی نابینای عەرەب لەعێراق ساڵی دووهەزارو سێ، ئەگەر زۆر ئەوەیە بەعسی سوریاش دوای پەنجاو چوارساڵ بکەوێت یان بەتەواوی لات و پوت بێت، لەمەنگەنە دانی ناسیونالیزمی عەرەب بەمانای ئەوە نایەت سبەی ئەو ئاوەزە میلیشیاییە شوناس تاریکانە بەهەشت بۆ هاوڵاتیانی سوری چێدەکەن، دەستوەردانێکی گەورەی تورکی ئێرانی ڕوسی هەروەها ئەمەریکی و ئیسرائیلیش لەسوریادا هەیەو ئێستا چواردە پارێزگاکەی سوریا بەتەواوەتی لێکتر ترازاون و هەر چەند دانەیەکیان لەبن چنگی لایەنێکە، لەنێو ئەو دۆزەخە مەترسیدارەدا، خۆسەری ڕۆژئاوا، هەسەدەو قەسەدو شەڕوانەکانی ڕۆژئاوا، ئاکاری ترین و پێشکەوتوترین ڕێکخراو، دەسەڵات، خۆبەڕێوەبەری ناوچەکەن گەرچی تورکیاو جاشەکانی بەردەوام کێشەو گیرو گرفتی گەورەیان بۆ درووست دەکەن.

لەو بارو دۆخەدا کورد دەبێت چی بکات، بێگومان قسە لەسەر کوردی هەموو بەشەکانە، نەک کوردی ڕۆژئاوا، گرنگترین خاڵ ئەوەیە کورد لەدەرەوەی وڵات، لەتاراوگە، ڕێکخراوەکانی کورد، کەنەکە، نوێنەرەکانی ڕۆژئاواو کورد بەگشتی وێڕای هاوکاری بۆ کوردانی ڕۆژئاوا، ئەو وێنە جیاوازەی کورد کە وینەیەکی ئەرێنی و گەشە نیشانی دنیا بدەن و بەردەوام لۆبی بۆ بکەن، ئەمەش بە بەرنامە و ئاوازیانە، هەوڵی دەرەوە و خەباتی دەرەوە زۆر گرنگە.

هەروەها کوردانی باکور بەپێ توانای خۆیان لەناوخۆی تورکیا دۆخێک بەڕێبخەن کە تورکیا یەکەم دەستوەردان کەمبکاتەوە ئەوەش بەخۆپیشاندان و داوای دورخستنەوە دەستوەردانی دەرەکی، دوەم پارتەکانی دیکەی جگە لەئاکەپەو لەناو ئاکەپەشدا باڵی ڕیفۆرمیست کەهێشتا تاک و تەرایان ماون وا حاڵی بکەن دەکرێت تورکیا وەک دۆست مامەڵە لە ڕۆژئاوا بڕوانێ و سودی هوبەش هەبێت، یانی  دۆخێک ئەفرێنرێ کە تورکیا وەک مەترسی بۆ سەر خۆیان لەڕۆژئاوا نەڕوانن، ئەمەش کات و قوربانی دەوێت، بەتایبەت لەگەڵ دەوڵەتێکی ستەمگەرای وەک تورکیادا.

هەرێمی کوردستان دەبێت لەهەر لا زیاتر پشت و پەنای ڕۆژئاوا بێت و کێشەی بۆ نەسازێنێ و دەرگا بەڕووی هاوکاری ئەوێدا بکاتەوەو لەتەک نوێنەرایەتی وڵاتان و کونسڵگەریەکان گفت و گۆ لەبارەی چارەنوسی ئەو خۆسەریە کوردیەوە بکرێت و وێنەس سەدان ساڵ چەوسانەوەو بێ شوناسی ئەوان نیشانی کونسڵگەریەکان و لەڕێی ئەوانیشەوە وڵاتەکانیان بدرێت، ئەو ئازایەتی و جەربەزەییەی شەڕڤانایش لەشەڕی داعشدا بیری هەموو لایەک بخرێتەوە، ئێستا کاتی ململانێ و شەڕی کۆنە قین و پرتەو بۆڵە نیەو کاتی هەڵوێستە، دەبێت هەموو لایەک درک بەوە بکەن گەیشتنە ئامانجی ڕۆژئاوا پاڵپشتیەکی گەورەیە بۆ کوردانی بەشەکانی تر ، کەوتنیشی کەوتنی شوێنگەلی دیکەشی بەدوادا دێ.

سەردەمێک هاتوەتە پێش کە پێدەچێت نەخشەی ناوچەکە، کەنەخشەیەکی کۆڵۆنیالانەی ستەمکارانەیە گۆڕانی بەسەردا بێت، کورد پێویست لەهەموو خەڵکانی دیکە زیاتر بیر لەدەسکەوتی ئەرێنی بکاتەوەو کاری لێبڕاوانەی بۆبکات.

بەرپڕسیارەتی گەورە لەئەستۆی لایەنەجیاجیاکانی هەرێمی کوردستان و پارچەکانی دیکەشە کەئەم دەرفەتە لەکیس نەچێت، کوردانی ڕۆژئاواو بەرپرسانی ئەوێ زۆر باش بەئەرکی خۆیان هەڵدەسن، بەرپرسیارەتی لەئەستۆی ئەوانی ترە، بێگومان ئەگەر لایەنێکیش نەیەوێ هاوکاربێت و پاڵپشت بێت، لانی کەم دەکرێ نەبێتە مایەی زەرەر دان لەپرسە چارەنوسسازەکە، کاتێکی لەبارە بۆ ئەوەی مێژو لەسەر ئەو ڕابردوە پڕ خوێن و ستەمە دادگای بکرێت و ڕۆژگارێکی نوێ سەر هەڵبدا.