کابینەکەی مەسرور بارزانی و تیۆریی ئەسپی مردوو

وا بۆ حەوت ساڵی رەبەق دەچێ کە مەسرور بارزانی بە پشتیوانیی رەهای باوکی و بە لەشکرێک لە کەسانی ئەمنی، تازە هەڵتۆقیو و بوقی ئیعلامیی بەرماوەی ئەم و ئەو  دەیەوێ خۆی وەک رزگارکەر و فریادڕەس نیشان بدات!
*
بوقە بەرماوەکەی مەسرور بارزانی و کوڕەکەی رێک ئەوە دەکەن کە لە تیۆریی ئەسپی مردوودا هەیە، دەیانەوێ بە هەر نرخێک بێ، مردوویەک بە زیندوو نیشان بدەن. لەوەش واوەتر بۆ هەموو شکست و نەهامەتییەک بیانویەک بدۆزنەوە و بە هەراو هۆسە دەرخواردی خەڵکی بدەن.
*
مەسرور بارزانی و حکومەتەکەی وەک ئەسپی مردوون. لەو تییۆرییەدا، لۆژیکیترین کردار ئەوەیە کە کاتێک دیتت ئەپەکە مردووە، لێی بێیە خوار و بەجێی بهێڵێ، بەڵام بوقی بەرماوە دەڵێ: هەر ئەمڕۆ جوانترین و نوێترین زین و لغاومان بۆ ئەسپەکە کڕی!
نەک مردنی ئەسپەکە قەبوڵ ناکات، بگرە وەک چۆن پێیانوایە کە خەڵک تێر و پڕە، بەڵام بە ملیۆن نان بۆ فەقیر دەبەخشنەوە، ئاواش دەڵێن لەمەودوا باشترین خواردن دەدرێتە ئەسپەکە!
*
ئینجا دەکەونە سەر بەشینەوەی تۆمەت بۆ ئەوانەی پێش خۆیان و دەڵێن: ئەو جەنگاوەرەمان گۆڕی کە سواری ئەسپەکە دەبوو! مەیتەری ئەسپەکەمان دەرکرد و یەکێکی دیکەمان لە جێگە دانا و، ئینجا لە زانکۆی شازادە کۆنفڕاسێکی نێودەوڵەتیمان رێکخست بۆ دۆزینەوەی رێکارەکانی پەرەپێدانی خێرایی ئەسپەکە!
*
ئینجا لیژنەی جیاجیا پێک دەهێندرێن بۆ شڕۆڤەکردنی دوایین بارودۆخی ئەسپەکە و دوای چەندین مانگ دەگەنە ئەو ئەنجامەی کە ئەسپەکە مردووە!
*
بەوەش ناوەستن و دێن ئەسپە مردووەکە لەگەڵ ئەسپی مردووی دیکە موقاڕەنە دەکەن و دەگەنە ئەو ئەنجامەی کە کێشەکە لەوەدایە نەیانتوانیووە لەخەڵک بگەیەنن کە ئەسپەکە نەمردووە، بۆیە پێویست دەکات بودجەی زیاتر بۆ بوقی بەرماوە ، کاوێژکار و مەترەق بەدەستەکان تەرخان بکەن تا چەمکی (مردوو) سەرلەنوێ تەعریف بکرێتەوە و ئەوە بەرجەستە بکەن کە هێشتا ئەسپەکە نوززەی تێدایە!
*
دابەزە…ئەسپەکە تۆپیوە