چی لە چەمچەماڵەوە فێربین؟

ڕووداوەکەی چەمچەماڵ هەر رووداوێکی سروشتی ئاسایی نەبوو، بەڵکو چەند خاڵێکی گرنگی بۆ دەرخستین:

یەکەم: ئیدی لە دنیایەکداین کە هەواڵ و  ڕووداو هەر بە بێدەنگی نامێنێتەوە. دوو ڕۆژە چەمچەماڵ و دەوروبەری سەردێڕی کۆی میدیاکانن. ئەم ڕووداوە دەریخست کە چیدی ناکرێت رووداو بە شاراوەیی بمێنێتەوە و خۆی هەر ئەمەش دیوە ئیجابیەکەی میدیایە.

دووەم: هیچ ڕووداوێک بارتەقای ئەم رووداوە ڕوخساری بەرپرسانی هەڵنەماڵی و لایەنە پەیوەندیدارەکانی ئیحراج  نەکرد، ئەمەش  وا دەکات ئیدی دەبێت ئەم رووداوە وامان لێ بکات لەبەرپرسان بپرسینەوە و ستۆپێک بەو هەموو بێحورمەتییە بکەین.

سێیەم: پەرۆشی خەڵکی مەدەنی و یارمەتیدان و بەتەنگەوەهاتن، دیمەنێکی یەکجار جوانی ئەم ڕووداوە بوو. زۆرێک لە خەڵک پیش دەسەڵات  و لایەنەکان بەتەنگ سەر و ماڵی خەڵکەوە بوون. ئەمەش ئەو هاوخەمییە دەردەخات سەرباری ئەو دۆخە نالەبارە، هێشتا مرۆڤ لەم هەرێمە  لەمرۆڤایەتی نەکەوتووە.

 چوارەم: بەتەنگەوە هاتنی خەڵک بۆ کتێبخانەی گشتی چەمچەماڵ و پەرۆشی خەڵک بۆ پڕکردنەوەی کتێبخانەکە، ئومێدبەخشە بەوەی هێشتا گیانی خوێندن و زانیاری و کتێب لەم شارەدا زیندووە.

پێنجەم: بەتەنگەوەهاتنی خوێندکاران بەتایبەت  مامۆستا ئازاکانی قوتابخانەی قەندیل لە تەکیە، ئەو ڕاستییەی دەرخست کە مامۆستای مەزن دەتوانێ کۆمەڵگەیەکی تەندروست پەروەردە بکات.

 شەشەم: بەتەنگەوەهاتنی گیانداری سەر شەقامەکان و ڕزگارکردنی سەگی بێلانە، لەو دیمەنە ژیاندۆست و ئاژەڵدۆستانە  بوو کە سیمای هەرە دیاری جوانییەکانی مرۆڤ لە چەمچەماڵ نیشان دەدات. 

 حەوتەم: میواندۆستی و جوانییەکانی ئەم شارە لەم ڕووداوەدا دەرکەوت، پیاوێکم بینی هیچی بۆ دەرنەچبوو، کەچی بە پەیامنێری کەناڵەکەی دەوت:  نیوەڕۆ میوانمان بە ئەمەش ئەوپەڕی جوانی  و میواندۆستی خەڵکی ئەم شارە بوو.

هەشتەم: ژنێکی ئازای چەمچەماڵ دەڵێ: دەبێ قایمقام دەست لەکار بکێشێتەوە، بارتەقای کۆی هێزەکانی بەناو ئۆپۆزسیۆن ڕادیکاڵ و هوشیار و خۆنەویست بوو، کە هیچ هێزێکی سیاسی ئەو جورئەتەی نەکرد بە ئاشکرا دەنگ هەڵبڕێت.

نۆیەم: ئەم ڕووداوەی چەمچەماڵ دەریخست کۆی دامەزراوەکانی حکومەت پەکیان کەوتووە و خەڵکی کوردستان کۆمەک بۆ ئەو شارە کۆ  دەکەنەوە. ئەمەش دەریدەخات لەبەردەم مۆدێلێکی کۆتایی دەسەڵاتداین کە ناتوانێت و نایەوێت خزمەت بە شارێک بکات کە لە غازی سروشتیدا دەوڵەمەندترین ناوچەی کوردستانە.

دەیەم: لەم سەروبەندەدا خەریکە کۆدەنگییەک دژ بە بەرپرسان دروست دەبێت، ئۆپۆزسیۆنی ساختە دیت و دەڵێت بەرپرسانی چەمچەماڵ دەدەینە دادگا، وەک ئەوەی دادگا زۆر باڵا دەست  بێت لەم وڵاتە. وەک کۆی جارەکانی تر ئەمجارەش ئۆپۆزسیۆنی ساختە فریای دەسەڵات کەوت.