بۆچی راگەیەنراوەكەی ئەمڕۆی وەزارەتی كارەبا باش نیە؟؟. كاتێك وەزارەتی كارەبا وحكومەت خزمەتگوزاریت پێدەدات، لەبری ئەوە مانگانە تۆ حەقێك دەدەیتەوە وەزارەت لەبەرامبەر ئەم بڕە كارەبایەی بەكارتهێناوە, ئەمە كارێكی یاساییەو دەبێت هاوڵاتیان پابەندی بن، بەڵام كاتێك دۆخەكە ناسروشتیە قسەی دیكە هەڵدەگرێت.

 بۆ نمونە وەزارەتی كارەبا دەڵێت : هاوبەشەكان دەبێت لەماوەی 50 رۆژ پارەی كارەبای روناكی بدەن ئەگینا دەبڕدرێت، یان قەرزی كۆنیش وەك پڕۆژەی روناكی هەژمار دەكەین. لێرەدا چەند شتێك پێویستی بە بەرچاوو روونیە: -قەرزی كۆن دەبێت لەگەڵ پاشەكەوتی موچە هەژمار بكرێت، تۆش پەنجا ملیۆن دیناری پاشەكەوتی موچەكەم بدەوە، منیش قەرزی كۆنی كارەباكەت دەدەمەوە, بۆیە ناكرێت ئەم قەرزە كۆنە بخرێتە سەر پڕۆژەی روناكی و زوڵمە لە موچەخۆران و هاوڵاتیان.

-موچەی خەڵكی كوردستان بارمتەی سیاسی نێوان هەرێم و بەغدایەو چۆتە ناو هاوكێشەی سیاسی دەوڵەتی عێراق، مانگ نیە كێشەی بۆ دروست نەكرێت، ئەوەتا ماوەی پەنجا رۆژە موچە نەهاتووەو تازە بەتازە بە لێبڕینی 120 ملیار دینار بەغداد ناردوویەتی، كەواتە كە ژیانی خەڵك لەسەر موچەیەو بە پەنجا رۆژ موچەیەك دێت، ناكرێت تۆ فشاری كات و سات و وەختم لێ بكەیت، بۆیە پێویستە ئەم پەنجا رۆژە بكرێتە سێ مانگ جارێك، یان زیاتر. كە موچە لە كاتی خۆی نەیەت، تۆش نابێت لەكاتی خۆی داوای قەرزەكەت بكەیتەوە. -پەرلەمانی كوردستان نیە، حكومەت كاربەرێكەرە، هەرێمی كوردستان بودجەی ساڵانەی نیەو حكومەتیش لە بەغداد بودجەی پەسەند نەكردووە، كەواتە چۆن گرەنتی ئەوە بكەین بە 60 شەست رۆژ جارێك موچەكەمان نەیەت؟

 وەزارەتی كارەبا خۆ تۆش لەم وڵاتە دەژیت و دەزانیت حاڵی خەڵك و موچەخۆر لە چ عەزابێكدایە!!!. -من دژی پڕۆژەی روناكی و دابینكردنی كارەبا نیم و لەرووی ژینگەیی خزمەتی زۆری كردووەو هەزاران مۆلیدەی كوژاندۆتەوەو پارەی مۆلیدەی بۆ خەڵك گەڕاندۆتەوە, بەڵام لەبەرئەوەی هەرێمی كوردستان بودجەی ساڵانەی نیە، سیستەم نیە، موچە جێگیر نیە، كاروكاسبی بەستراوەتەوە بە موچەو بودجەوە، بۆیە نابێت ئەم فشارانە لە هاوڵاتیان بكرێت. هاوڵاتیان پێویستە پارەی كارەباو خزمەتگوزاریەكان بدەن، بەڵام بەگوێرەی قەیران و قۆناغ و گیرفان و داهاتی دیاریكراویان، نەك بە گوێرەی بڕیارو راسپاردەی كۆبونەوەكانی بەردەم سپلێت ؟؟؟.