بۆچی كوردانی ڕۆژهەڵات دڵخۆشن ؟

ڕۆژهەڵاتیەكان دڵخۆشن بەوەی كە دیكتاتۆرێك لە فڕۆكەكەی كەوتە خوار و گیانی لەدەست دا.

من دەزانم دیكتاتۆرێكی خوێنڕێژتر دێتە شوێنی، بەڵام لانی كەم لە دنیایەكدا كە كەس گوێی لە كوردەكان نیە، جیهانێك كە كەس هەناسەی پێش لەسێدارەدانی گەنجێكی سنە نابیستێت، سەردەمێكی هێندە بێ ڕەحم كەس گریان و ناڵەی دایكە شەهیدێكی ڕۆژهەڵاتی گوێ لێنەبێت، مردنی ستەمكارێك بە هەر هۆكارێك بێت لانی كەم بۆ ساتێكی كەمیش بێت دڵخۆشی لەگەڵ خۆیدا دەهێنێت.

من لەو مەخلوقانەم كە مردن دەموەستێنێت. لاشەی كۆترێك، قروسكەی سەگێك كە بەردی تێدەگرن، مرداربوونەوەی پشیلەیەك لەبرسا ڕامدەچڵەكێنێت.

سەدام حسین كە گوندی سوتاندین و كەس و كاری ئەنفال كردین، ئەو كاتەی كە پەتی سێدارە دەخەنە ملی، بەدەست خۆم نەبوو كەمێك ڕاچڵەكیم.

بۆ من گرنگە ڕق تێكەڵی لایەنە ئینسانیەكەی ناخی خۆم نەكەم. مردن بە هەر شێوەیەك بێت لانی كەم دەبێت كەمێك ڕامانچڵەكێنێت.

بەڵام بەڕاستی ئاسان نیە ڕژێمێك لە ئێران پەتی سێدارە بۆ گەنجەكان هەڵبخات و ئەو كۆڵبەرانەی سەر سنور بكوژێت كە بە خوێن دەیانەوێت نان پەیدا بكەن، ڕژێمێك " قاسملو" تیرۆر بكات و " كاك فوئاد" خەڵتانی خوێن بكات و نەتەوەیەك لە ڕۆژهەڵات لە سەرەتاكانی مافی خۆیان بێبەش بكات، لانی كەم دووكەوتنەوەی چڕوچاوی ستەمكارێك لەبەرچاوان كەمێك ڕۆژهەڵاتیەكان دڵخۆش دەكات.

لەم كاتەدا ڕژێمی كۆماری ئیسلامی هێندە دڵڕەقە كە بە كۆی زلهێزەكان و شۆڕشە كۆمەڵایەتیەكانی ناوەوەی ئێران و كۆی هێزە ئۆپۆزسیۆنەكان نەتوانن كەمێك لەم دڵڕەقی و دەستی خوێناویەی ڕژێم كورت بكەنەوە، خۆ لانی كەم ئەو مافەیان هەیە دووركەوتنەوەی جەستەی عەمامەبەسەری ئاخوندێك لەبەرچاوان كەمێك دڵخۆش بن.

ئەمە بۆ توركیش هەر ڕاستە. دەسەڵاتدارانی تورك هێندە سیتەمكارن، لانی كەم بە نەخۆشكەوتنی ئاردۆگان، یان گلانی ئەسپەكەی ئاردۆگان لە یاریگایەكدا كەمێك دڵخۆشی بە كوردان دەبەخشێت.

دەبێت هەموو مەرگێك ڕامانچڵەكێنێت، بەڵام ڕۆژهەڵاتیەكانیش پەپولە نین، ئەم هەموو ستەمكارییەی كۆماری ئیسلامی لانی كەم بە مەرگی كۆڵەكەیەكی ئەو ڕژێمە دڵخۆشن و دەبێت لانی كەم ئەو دڵخۆشیەیان لەگەڵدا بەش بكەین