تورکیا چەند ناوچەیەکى لە هەرێم بۆردومانکرد

ناوەندی هەواڵ

بۆردوومانەکانى تورکیا لە ناوچەکانى هەرێم بەردەوامییان هەیە و ئەمڕۆش هەریەک لە ناوچەکانى ناڵپارێز و گوندەکانی گوهەرزێ و کانی بەلاڤێی لە سنووری شارۆچکەی ئامێدی بۆردومانکرد.

بەپێى زانیارییەکان، ئەمڕۆ چوارشەممە 17-7-2024، تورکیا بە چڕی بۆردوومانی گوندەکانی گوهەرزێ و کانی بەلاڤێی لە سنووری شارۆچکەی ئامێدی کرد و بەهۆیەوە ئاگرێکى فراوان لە سنورەکە کەوتوەتەوە و تا ئێستا زیاى بۆردوومانەکان نەزانراوە.

هەر ئەمڕۆ بە فڕۆکەی بێفڕۆکەوان بۆردوومانی سنووری گوندی بادانای لە سنوورى شارەدێی ناڵپارێزی سەر بە شارۆچکەی پێنجوێن لە پارێزگای سلێمانی کرد و بە هۆی بۆردوومانەوە ڕووبەڕێکی بەرفراوانی پووش و پاوانی سنوورەکە سووتا.

ماوەی دوو هەفتەیە، دەوڵەتی داگیركەری تورك هەزاران سەرباز و سەدان تانكی هێناوەتە سنووری پارێزگای دهۆك و هێرش و داگیركارییەكانی بۆ سەر هاوڵاتییانی مەدەنی و گوندشینان زیاتر كردووە، دانیشتووانی ئەو سنوورانە بەهۆی بۆردوومانەكانی دەوڵەتی تورکەوە ناچاربوون گوندەكانیان چۆڵ بكەن.

ئەو ناوچەیەی بۆردوومانکراوە سەدان کیلۆمەتر لە تورکیاوە دوورە و بە تەواوی پێشێلکاریی سەروەریی خاکی عێراقە، بەڵام دەوڵەتی تورک بە بەرچاوی حکومەتی هەرێم و بەغداوە بۆردوومان دەکات و زیان بە ناوچەکە دەگەیەنێت و هاوڵاتییانی مەدەنیی بە ئامانج دەگرێت و بەرپرسانیش هیچ هەڵوێستێکیان نەبووە و بێدەنگیان هەڵبژاردووە.

بەپێی ئامارێکی تیمی کوردستانی عێراقی ڕێکخراوی سی پی تی ئەمریکی، لە15ی حوزەیرانەوە تا ئێستا، بەهۆی بۆردوومانی دەوڵەتی داگیرکەری تورکەوە،  68 هەزار دۆنم زەوی کشتوکاڵیی و دارستان سووتاون و ماڵی 19 هاوڵاتی بە بۆردوومان تەخت کراون.