2024-07-17
216 جار خوێنراوەتەوە
هێزەکانی 70ی یەکێتی لەبارەی دواکەوتنی مووچە هۆشداری دەدات
ناوەندی هەواڵ
فەرماندەیی هێزەکانی 70ی یەکێتی، ڕایدەگەیەنێت ئاوان، چیدیکە ئامادەنین مووچە و قوتی پێشمەرگەکانمان بکرێتە بارمتەی ناڕوونیی زانیاری و داتاگەلێک کە پەیوەندی بە هێزەکانمانەوە نییە، دەشڵێت، ئەگەر بەغداد راستەوخۆ لیستى مووچەیان لێوەربگرێت، ئامادەکاریى تەواویان کردووە.
فەرماندەیى هێزەکانى 70 راگەیەندراوێکی لەبارەی خەرجکردنی مووچەی مانگەکانی ئایار و حوزەیرانی هێزە ئەمنییەکان و پێشمەرگ بڵاوکردەوە و دەڵێت، خەرجکردنی مووچەی دوو مانگ وەکو شایستەیەکی دارایی مانگانە و بەرامبەر ئەرکەکانیان لە پاراستنی هەرێمی کوردستان و بەرەنگاربوونەوەی هەڕەشەی تیرۆر لە عێراق، مایەی خۆشحاڵییە و دەبێتە مایەی هاندانی زیاتریان بۆ راپەڕاندنی ئەرکەکانیان لە خزمەتکردنی وڵاتدا.
دەقی ڕاگەیەندراوەکەی فەرماندەیی هێزەکانی 70:
خەرجکردنی مووچەی مانگەکانی ئایار و حوزەیرانی هێزە ئەمنییەکان و پێشمەرگە، وەک شایستەیەکی دارایی مانگانە و بەرامبەر ئەرکەکانیان لە پاراستنی هەرێمی کوردستان و بەرەنگاربوونەوەی هەڕەشەی تیرۆر لە عێراق مایەی خۆشحاڵییە و دەبێتە مایەی هاندانی زیاتریان بۆ راپەڕاندنی ئەرکەکانیان لە خزمەت کردنی ووڵاتدا.
هیوادارین لە مەودوا هیچ ئاستەنگێک نەیەتە رێی ئەم پرۆسەیە لە نێوان هەردوو وەزارەتی دارایی هەرێم و عێراق.
بەم بۆنەیەوە ئێمە لە فەرماندەی هێزەکانی ٧٠ی پێشمەرگەی کوردستان بە هەموو لایەکی ڕادەگەیەنین لەناو هێزەکانی فەرماندەیمان هیچ ناوێک بوونی نییە کە هەڵگری رەگەزنامەی وڵاتێکی تر بێت جگە لە رەگەزنامەی عیراقی و یەک ناویش نییە کە وجودی ماددی و فیزیکی نەبێت . واتە ناوی وەهمی بێت بەتایبەت دوای ئەوەی تۆماری بایۆمەتریان بۆ ئەنجام دراوە.
بۆیە روون و رەوان رایدەگەیەنین کە بۆ مووچەی ئەم مانگی تەمووزە ئێمە ئامادەیی تەواومان هەیە کە لیستی تەواوی ناوی پێشمەرگەکانمان بە زانیاری و بەڵگەنامەی داواکراوی پێویستیەوە پێشکەش بکەین و چیتر ئامادە نین مووچە و قوتی بنەماڵەکانیان بکرێتە بارمتەی ناروونی زانیاری و داتا گەلێک کە پەیوەندی بە هێزەکانمانەوە نییە.
تەنانەت ئەگەر وەزارەتی دارایی فیدراڵ راستەوخۆ لیستەکانمان لێوەربگرێت ئێمە ئامادەکاری تەواومان کردووە و گومانمان لە راستی و دروستی زانیاری و داتاکانمان نییە.
فه رمانده يى هێزه كانى /70
|