چه‌ك له‌ده‌ستێكى ئه‌میندا نییه‌.. چه‌ك مۆته‌كه‌ى ژیانى هاوڵاتیان له‌هه‌رێم

چه‌ك بوه‌ته‌ مۆته‌كه‌ى گیان‌و ژیانى هاوڵاتیان له‌هه‌رێم‌و هه‌ر ڕۆژو شه‌وه‌ى هه‌واڵى پێكدادانى نێوان هاوڵاتیان له‌لایه‌ك‌و هاوڵاتیان هێزه‌ ئه‌منیه‌كانیش له‌لایه‌كى دیكه‌وه‌ بڵاوده‌بێته‌وه‌.

له‌و ڕوه‌شه‌وه‌ دەستەی مافی مرۆڤى هه‌رێم جه‌ختده‌كاته‌وه‌، "چەک لاى کەسانێکە کە مەترسین بۆسەر ئاسایشى گشتیى".

مانگى حه‌وت له‌سنورى هه‌ولێرو دهۆك ناكۆكى هه‌ركى‌و گۆرانه‌كان، 22ى مانگى ڕابردوو له‌سلێمانى‌و 2ى ئه‌م مانگه‌ش جارێكى دیكه‌ش له‌سلێمانى، چه‌ك كاره‌ساتى گه‌وره‌ى دروستكرد، سه‌رباریى نائارامى، قوربانیانى گیانیش ئێجگار زۆربون.

له‌و ڕوه‌وه‌ دەستەى سەربەخۆى مافى مرۆڤ ڕایدەگەیەنێت، "تائێستا چەک لاى کەسانێکە کە مەترسین بۆسەر ئاسایشى گشتیى‌و زۆرجاریش داواکراوان ڕوبەڕوی هێزە ئەمنییەکان دەبنەوەو خەڵک‌و ماڵەکانی خۆیان وەک قەڵغان بەکاردێنن".

دەستەی سەربەخۆی مافی مرۆڤ لەپەیامەکێكدا نوسیویه‌تى، "ڕوداوەکەى شێخان پێی وتین، تائێستا چەک لەلای خەڵکانێک هەیە لەدەرەوەی یاساو مەترسیین بۆسەر ئاسایشی گشتیی خەڵک‌و بابەتی مادە هۆشبەرەکانیش بوەتە پرسێکی گرنگ‌و جێی هەڵوەستەکردنە".

هەروەها داوادەکات، لەو پرسانەدا یاسا سەروەربێت‌و داواکراوان بەڕێکاری ئاسایی‌و یاسایی خۆیان ڕادەستی دەزگا ئەمنییەکان بکەن‌و نەبنە مایەی تێکدانی ئاسایش‌و ئارامی‌و هێزە ئەمنییەکانیش لەکاتی دەستگیرکردنی داواکراوان ڕەچاوی پاراستنی ژیانی خەڵکی دیکە بکەن سنوری کێشەکە گەورەتر نەکەن.