له‌باره‌ى موچه‌ى خانه‌نشینانه‌وه‌ زانیاریی گرنگ ئاشكراده‌كرێت

وەزارەتی دارایی عێراق ڕاگه‌یه‌نراوێكى بڵاوكردوه‌ته‌وه‌و له‌باره‌ى موچه‌ى خانه‌نشینانه‌وه‌ زانیاریى گرنگى ئاشكراكردوه‌، ده‌شڵێت، "دواکەوتنی دابەشکردنی موچەی خانەنشینان پەیوەندیی بەنەبونی پارەی نەختینەوە نییەو هۆکارەکەی هونەرییە".

خانەنشینان لەعێراق سەرەتای هەموو مانگێک موچەیان وه‌رده‌گرت، بەڵام ئەم مانگە چەند ڕۆژێکە دابەشکردنی موچە دواکەوتوە، بۆیەش دەنگۆی نەبونی پارەی نەختینە (سیولە) بڵاوکرایەوە، کە زۆرجار بۆ دواکەوتنی موچەو پارەی پڕۆژەکان وەک هۆکارێک باسی لێوەدەکرێت.

له‌وباره‌یه‌وه‌ وەزارەتی دارایی عێراق ڕونکردنەوەیەکى بڵاوكردوه‌ته‌وه‌و ده‌ڵێت:"موچە بەتەواوی گەرەنتیکراوەو لەبودجەدا چەسپێنراوە، بۆیە دواکەوتنی دابەشکردنی موچەی خانەنشینان پەیوەندیی بەنەبونی پارەی نەختینەوە نییە، بەڵکو هۆکارەکەی هونەرییەو پەیوەستە بەپرۆسەی ناردنی پارە لەنێوان بانکەکان‌و ئامێرەکانی ڕاکێشانی پارەوە، بەوهۆیەش ڕاگەیاندنی وادەی دابەشکردنی موچە دواخراوە".

وه‌زاره‌تى دارایی جه‌ختیكردوه‌ته‌وه‌، شەوو ڕۆژو بەبەردەوامی کار بۆ چارەسەری کێشەکە دەکەن بۆ ئەوەی لەماوەیەکی کەمی داهاتودا دەست بەدابەشکردنی موچە بکرێت، لەڕێگەی باشترکردنی ئامێرەکانی ڕاکێشانی پارەو هەماهەنگی لایەنە پەیوەندیدارەکانیش کاردەکەن تا ئەو کێشەیە دوبارە نەبێتەوە.