ته‌یف سامى دوو مه‌رجى هه‌یه‌ بۆ موچه‌ى مانگى حه‌وت

به‌پێى میدیای عێراقی، وه‌زیرى دارایی عێراق دوو مه‌رجى دیاریكردوه‌ له‌به‌رامبه‌ر ناردنى موچه‌ى مانگى حه‌وتى فه‌رمانبه‌ران‌و موچه‌خۆرانى هه‌رێ.

زانیارییه‌كان ده‌ڵێن، وەزیری دارایی عێراق بەشاندی هەرێمی وتوە، هەتا هەناردەی نەوت دەستپێنەكاتەوەو داهاتی نانەوتی ڕادەستنەكەن، موچەی مانگی حەوت نانێرن.

ئه‌وه‌ش ئاشكراكراوه‌، لەدوایین كۆبونەوەی تەیف سامی وەزیری دارایی حكومەتی فیدڕاڵ‌و شاندی حكومەتی ماوەبەسەرچوی هەرێمی كوردستاندا، تەیف سامی بەشاندەكەی هەرێمی وتوە، ئێمە ئامادەین موچەی مانگی حەوت بنێرین، بەڵام مەرجی سەرەكیمان بۆ ناردنی موچە هەیە.

زانیارییەكان ده‌ڵێن، تەیف سامی وتویه‌تى، موچەی مانگی تەمموز نانێردرێت بەدوو مەرج نەبێت، مەرجی یەكەم ئەوەیە كە بڕی دیاریكراو لەنەوتی هەرێم ڕادەستبكرێت‌و دەست بەهەناردەكردن بكرێتەوە.

وه‌كو ته‌یف سامى وتویه‌تى، هەروەها مەرجی دوەمیش ئەوەیە كە لەسەدا 50ی كۆی داهاتی نانەوتی ڕادەستی بەغدا بكرێت بەداهاتی دەروازە سنورییەكان‌و گومرگ‌و باج‌و هاتوچۆو تەندروستی‌و ئاوو كارەباوە.

ئەمەش لەكاتێكدایە مانگی ئەیلول دەستیپێكردوەو هێشتا دابەشكردنی موچەی مانگی حوزەیران تەواو نەبوە، تائێستاش حكومەتی ماوەبەسەرچوو بەتەواوی پابەندییەكانی بەرامبەر بەغدا جێبەجێنەكردوە، بەو هۆیەوە چارەنوسی موچەی دوو مانگی ڕابردوو بەنادیاری ماوەتەوە.