زه‌نگى مه‌ترسییه‌كى گه‌وره‌ له‌سلێمانى لێدرا

بەڕێوەبەری گشتیی تەندروستی سلێمانی، زه‌نگى مه‌ترسییه‌كى گه‌وره‌ له‌سلێمانى لێداو ده‌ڵێت:"ئەگەر ئەو کێشە داراییەی پارێزگاکەی گرتوەتەوە چارەسەرنەکرێت، تاوه‌كو هەفتەیەکی دیکە، خزمەتگوزارییە تەندروستییەکان لەسلێمانی ڕادەگیرێن".

د. سەباح هەورامی بەڕێوەبەری گشتیی تەندروستی سلێمانی ڕایگه‌یاند، "ساڵانە بڕێک پارە وەک تەرخانکراوێک بۆ کڕینی دەرمان‌و پێدوایستی‌و ئامێری پزیشکی دادەنرێت، ئەمساڵ لەکۆی 27 ملیار دیناری تەرخانکراو، تەنها توانیومانە حەوت ملیار دیناری خەرجبکەین، چونکە پارەی نەختینەمان نییەو کۆمپانیاکان ئامێرە تەندروستییەکانمان پێ نافرۆشن".

ده‌شڵێت، "لەچەند ڕۆژی داهاتودا خزمەتگوزاری تەندروستی بەشێوەیەکی بەرچاو لەسنوری پارێزگای سلێمانی کەمدەکات‌و ناتوانین زۆربەی خزمەتگوزارییەکان پێشکەشبکەین".

ئه‌وه‌شى وت، "کەمبونەوەی خزمەتگوزارییە تەندروستییەکان نەشتەرگەرییەکانی قەستەرە ناگرێتەوەو هەوڵدەدەین سەنتەرەکانی فریاکەوتنەکانیش کەمترین کاریگەرییان لەسەر هەبێ، بەڵام خزمەتگوزارییەکانی تریش هەموی هەستیارن".

به‌وته‌ى هه‌ورامى، "بۆ نمونە ئەگەر کیسی خوێنت نەبێ‌و نەتوانی پشکنینی ڤایرۆس بۆ خوێنی نەخۆش بکەین، هەموو نەشتەرگەرییەکان بەفریاکەوتنەکانیشەوە ڕادەگیرێن، چونکە بەهیچ جۆرێک ناتوانیت خوێنێک بکەیتە جەستەی کەسێکەوە، کە پێشوەخت پشکنینی ڤایرۆسی بۆ نەکرابێت".