په‌یامێك له‌ئۆجه‌لانه‌وه‌.. "هیچ هێزێك ناتوانێت بمانوه‌ستێنێت

عەبدوڵڵا ئۆجەلان له‌په‌یامێكى نوێدا ڕایگه‌یاند، "ئەوكاته‌ى پێکەوەین هیچ هێزێک ناتوانێت بمانوەستێنێت"، ده‌شڵێت، "پرۆسەی ئاشتى سەرلەنوێ هەموان بەڕیشەو خاک‌و یادگەیانەوە گرێدەداتەوە".

عه‌بدوڵڵا ئۆجه‌لان له‌په‌یامێكدا كه‌ ئاڕاستەی فێستیڤاڵی کولتوریی کوردى لەشاری دۆرتمۆندی ئەڵمانیا کردوه‌ نوسیویه‌تى، "ئەوكاته‌ى پێکەوەین، هیچ هێزێک ناتوانێت بمانوەستێنێت‌و پێویستە ئامانجی سەرەکیشمان تێکۆشان بێت لەسەر خاکی خۆمان، پرۆسه‌ى ئاشتیش سەرلەنوێ هەموان بەڕیشەو خاک‌و یادگەیانەوە گرێدەداتەوە".

ئۆجەلان لەپەیامەکەیدا وتویه‌تى، "ئێوەی ئەوروپا نشین، بەهۆی ناچاریی‌و فشارەوە ڕوتانکردوەتە ئەوێ، بەبەرەوپێشچونی ئەو پرۆسەیەی دەستمان پێکردوە، گەڕانەوەی ئێوە بۆ وڵات، دەبێتە دەروازەی سەرەتایەکی نوێ".

باسى لەوەشكردوه‌، "بۆ بەرەوپێشبردنی کۆمەڵگەیەکی دیموکراتی لەوڵاتەکەیاندا، پێویستیان بەئەزمون‌و پشتیوانیی کوردانی تاراوگەیە، ئەو پرۆسەیەی هەوڵی بەرەوپێشبردنی دەدەین، سەرلەنوێ هەمومان بەڕیشە‌و خاک‌و یادگەمانەوە گرێدەداتەوە".

ئۆجەلان لەکۆتایی پەیامەکەیدا ئاماژه‌ى به‌وه‌شكردوه‌، "هەرکات ئەو میراتە کولتوریی‌و سیاسییەی ئێوەى گه‌نجان ئافراندوتانە، لەگەڵ ئەم تێکۆشانەدا كه‌ ئاشتى‌و برایه‌تیه‌ یەکبگرێت کە ئێمە پەرەی پێدەدەین، ئەوکات سەردەمێکی نوێ لەسەر ڕێگەی ئازادی‌و دیموکراسی دەستپێدەکات".