لە ژمارەی دانیشتواندا هەولێر پێش سلێمانی و هەڵەبجە کەوتەوە

ئیرادە میدیا

وەزارەتی پلاندانانی عێراق نوێترین داتاکانی سەرژمێری گشتیی دانیشتوانی بۆ ساڵی 2024 بڵاوکردەوە، کە ژمارەی دانیشتوانی عێراق و هەرێمی کوردستان بە کۆی گشتی گەیشتووەتە 46,118,793 کەس. سەرژمێرییەکە کە لە ڕێکەوتی 20-10-2024 ئەنجامدراوە، گۆڕانکاری گەورەی دیمۆگرافی تێدا ڕویداوە.

داتاکان دەریانخستووە کە زۆرینەی دانیشتوانی عێراق لە ناوچە شارنشینەکاندا نیشتەجێن. بە گشتی زیاتر لە 32 ملیۆن کەس کە دەکاتە (70.17٪) لە شار و شارۆچکەکاندا دەژین، لە کاتێکدا زیاتر لە 13 ملیۆن کەس کە دەکاتە (29.83٪) لە گوند و شارۆچکەکان نیشتەجێن.

کۆی گشتیی ژمارەی دانیشتووانی چوار پارێزگاکەی هەرێمی کوردستان (هەولێر، سلێمانی، دهۆک و هەڵەبجە) گەیشتووەتە 6.5 ملیۆن کەس، کە دەکاتە 14.13٪ی کۆی دانیشتوانی عێراق.

ژمارەی دانیشتووانی پارێزگای هەولێر بە ڕێژەیەکی بەرچاو زیادی کردووە و ئێستا گەورەترین پارێزگای هەرێمە لە ڕووی ژمارەی دانیشتووانەوە، بە ٢.٥ کەس کە دەکاتە (38.62٪) مەزەندە دەکرێت. بەمەش بێت 115,810 هاوڵاتی زیاترە لە کۆی دانیشتوانی هەردوو پارێزگای سلێمانی و هەڵەبجە پێکەوە (2,401,724 کەس).

لە هەرێمی کوردستاندا، بەرزترین ڕێژەی شارنشینی لە پارێزگای سلێمانی و هەڵەبجەدایە کە 89٪.

دانیشتوانی هەر یەک لە پارێزگاکانی هەرێمی کوردستان:
- هەولێر 2,517,534
- سلێمانی و هەڵەبجە 2,401,724
- دهۆک 1,599,871

لەسەر ئاستی عێراق پارێزگای بەغدا بە 9,780,429 کەس زۆرترین ژمارەی دانیشتووانی هەیە و نزیک بووەتەوە لە 10 ملیۆن کەس.

لە ڕیزبەندی گشتی پارێزگاکانی عیراقدا، پارێزگاکانی هەرێم بەم شێوەیەن:
- هەولێر لە پلەی چوارەم دێت.
- سلێمانی و هەڵەبجە لە پلەی حەوتەم دێن.
- دهۆک لە پلەی پازدەیەم دێت.

لە هەرێمی کوردستان، دابەشبوونی ڕەگەزی نزیکە لە یەکسان؛ 50.39٪ نێر و 49.61٪ مێن.

لە پارێزگاکانی ناوەڕاست و باشووری عێراق، بە گشتی 50.22٪ نێرن و 49.78٪ مێن، بەڵام لە چەند پارێزگایەکی وەک کەرکوک، نەینەوا، دیالە، ئەنبار و سەلاحەددین ڕێژەی دانیشتووانی مێ کەمێک زیاترە لە نێر، بۆ نموونە لە کەرکووک، ڕێژەی مێ 50.27٪ە بەرامبەر نێر کە 49.73٪ە.