سوتەمەنی تەواو دەبێت و نرخەکان باری سەرشانی هاوڵاتیانی ئێرانیان قورس کردووە

لەم چەند هەفتەیەی دوایدا، سەرەگرتن لەبەردەم بەنزینخانە و وێستگەكانی سوتەمەنی لە تاران و شارە گەورەكانی ئێران بووەتە دیمەنێكی باو، ئەمەش لەگەڵ توندكردنەوەی گەمارۆ ئابووریەكان بۆسەر ئەو وڵاتە لەلایەن ئەمریكاوە، هەندێك كەس دوو یان سێ کاتژمێر زیاتر نۆرە دەگرن تا ئۆتۆمبێلەكانیان پڕبكەن لە بەنزین یان گاز.

ئەوەی نادڵنیایی لای ئێرانییەكان دروستكرد، لێدوانی سكۆت بێسێنت وەزیری خەزێنەی ئەمریكابوو، كە ڕۆژی سێشەممەی ڕابردوو زنجیرەیەك سزای تری بەسەر ئێراندا ڕاگەیاند، بەوەش ئەمریكا دەیەوێت ئێران بە تەواوی لە ئابوری جیهان داببڕێت.

لەم چەند ڕۆژەی دواییدا، لێپرسراوانی باڵای ئێرانیش دانیان بەوەدا ناوە كە دۆخی خەڵك بەهۆی گەمارۆكانەوە سەختە، لەوانەش محەمەد باقر قاڵیباف سەرۆكی پەرلەمانی ئێران، جگە لەوەش باسیان لەوەكردووە ڕەنگە پشتیوانی نرخی بەنزین كەم بكەنەوە تا خۆیان لەگەڵ ئەو قەیرانە بگونجێنن كە ڕووبەڕوویان بووەتەوە.

ئامانجی ئەمریكا لە توندكردنەوەی گەمارۆكان ئەوەیە سازش بە ئێران بكات، ئەمەش دوای زیاتر لە شەش مانگ جەنگی ماوە ماوە و ململانێ كە ئەمریكا و ئیسرائیل لە كۆتایی شوباتی 2026 بۆسەر ئێران دەستیان پێكرد، ساڵی ڕابردووش زنجیرەیەك هێرشیان بۆسەر ئەو وڵاتە لە مانگی حوزەیراندا ئەنجامدا.

ئێرانیەكان دان بەوەدا دەنێن جەنگ زیانێكی زۆری بە ئابوریەكەیان گەیاندووە، بەڵام بارە قورسەكە زیاتر لەسەر شانی هاووڵاتیانی ئەو وڵاتەیە، سەرەڕای ئەوەش تائێستا هیچ ئاماژەیەك لە ئێرانەوە نیە تا تەسلیمی خواستەكانی ئەمریكا ببن، هەرچەندە لێپرسراوانی ئێران هۆشداری دەدەن لەوەی ئەمریكا و ئیسرائیل دەیانەوێت لە ڕێگەی گەمارۆكانەوە ئاگری ناڕەزایەتی ناوخۆیی لە ئێران سەرهەڵبدات، بەوەش بە ئامانجەكانیان بگەن.وەك چۆن لەسەرەتادا ویستیان بە ناڕەزایەتی ناوخۆ و لەگەڵ وەشاندنی یەكەم گورز لە ئێران، خەڵك كۆتایی بە دەسەڵات لەو وڵاتە بهێنن،بەڵام ئەوە ڕووینەدا و بەپێچەوانەوە، قسەو باسی دۆناڵد ترەمپ سەرۆكی ئەمریكا و لێپرسراوانی ئەو وڵاتە و ئیسرائیل، لە ڕووخاندنی دەسەڵاتی ئێرانەوە گۆڕدرا بۆ ڕێگرتن لە بەدەستهێنانی چەكی ئەتۆمیی و كردنەوەی گەرووی هورمز، كە لەگەڵ دەستپێكی هێرشەكان بۆسەر ئێران، گەرووەكە لەلایەن سوپای پاسدارانەوە داخرا.

باجی ئەو ململانێیە هاووڵاتیانی ئێرانی دەیدەن، سەرەڕای ئەوەی ململانێكان بەگشتیی كاریگەرییان لەسەر نرخی سوتەمەنی و كاڵاكان لە جیهان هەبووە، بەڵام لە ئێران بەهۆی گەمارۆكانەوە دۆخەكە جیاوازە، دابەزینی بەهای تمەن ئاستێكی مێژوویی تۆماركردووە، هەڵاوسان زۆربەی نرخەكانی گرتووەتەوە،دۆخەكە گەیشتووەتە ئاستێك مەسعود پزیشكیان سەرۆك كۆماری ئێران، ئەمریكای بەوە تۆمەتبار كرد دەیەوێت بە فشاری ئابوری ئێران ناچار بە تەسلیم بوون بكات، دوای ئەوەی لەڕووی سەربازیەوە شكستیهێنا، بەوەش ئێران بخاتە دۆخی بێسەروبەری و ئاژاوەوە.