هەڵوێستی ئەمریكا لەبارەی ڕووداوەكانی سوریا

ناوەندی هەواڵ

 گرووپە چەكدارەكانی سوریا زۆرینەی شاری حەلەبیان كۆنترۆڵكردووە و شەڕ بەردەوامە، كۆشكی سپی ئەمریكاش یەكەم راگەیەندراوی لەسەر دۆخی سوریا بڵاوكردەوە و ڕایگەیاند "هێزەكانمان لە سووریا دەپارێزین".

دەستەی تەحریر شام و گرووپە چەكدارە هاوپەیمانەكانی ئۆپۆزسیۆنی سوریا، زۆرینەی شاری حەلەبیان، بە فرۆكەخانە، ناوەندە حكومییەكان و زیندانەكانەوە كۆنترۆڵكردووە، روانگەی سووری بۆ مافەكانی مرۆڤ ڕایگەیاند: ئەو گروپانە  بەبێ بەرگریی سوپای سوریا پێشڕەوییان كردووە.

روانگەی سووری رەتیدەكاتەوە گرووپە چەكدارەكان گەیشتبنە شاری حەمای دراوسێی حەلەب، وەك ئەوەی لە تۆڕە كۆمەڵایەتییەكانی نزیك لە گرووپەكانەوە بانگەشەی بۆكرا.

دەشڵێت "حكومەتی دیمەشق هێز و پێگە سەربازییەكانی لە حەما رێكخستووەتەوە و خاڵی نوێی سەربازی لە دەوروبەری شارەكە داناوە".

كۆشكی سپی ئەمریكاش یەكەم راگەیەندراوی لەسەر دۆخی سووریا بڵاوكردەوە ڕایگەیاند:"لە نزیكەوە چاودێری دۆخی وڵاتەكە دەكەین و لەگەڵ وڵاتانی ناوچەكە پەیوەندیمان هەبووە، ئەمریكا هیچ پەیوەندییەكی بەم هێرشەوە نییە".

"رەتكردنەوەی بەردەوامی رژێمی ئەسەد بۆ بەشداری لە دانیشتنەكانی تایبەت بە پڕۆژە بڕیاری ئاگربەستی سووریا لە ئەنجوومەنی ئاسایشی نەتەوەیەكگرتووەكان، هەروەها پشتبەستنی بە رووسیا و ئێران، ئەو بارودۆخەی ئێستای هێناوەتە ئاراوە".  كۆشكی سپی وا دەڵێت.

ئاماژەی بەوەشكردووە، لە بەرگریی و پاراستنی تەواوی كارمەندانی ئەمریكا و پێگە سەربازییەكانیان لە سوریا بەردەوام دەبن، كە مانەوەیان لە ناوچەكە پێویستە بۆ دڵنیابوونە لەوەی كە داعش هەرگیز ناتوانێت جارێكی دیكە سەرهەڵبداتەوە.