کورد لە قۆناغی نوێ و پەیامەکەی ئیمڕاڵی

تا دەرگاکانی ئاشتی کراوەبێت، بژاردەی  چەکداریی پەسەند نییە، بەڵام ئاشتی وەک چەپڵە وەهایە و بە یەک دەست لێنادرێت، راگەیەنراوەکەی ئیمڕاڵی کە هەندێک بە "راگەیاندنی ئاشبەتاڵ" ناویدەبەن، هیچ لەو هەنگاوە سیاسییە کەم ناکاتەوە کە بەشێکی گرنگی نەتەوەی کورد دەستی برایەتی و پێکەوە ژیان بۆ گەلانی ناوچەکە درێژدەکات. 

ئەم راگەیەنراوە لە ڕواڵەتدا "سازشێکی قورسە" پاش نزیکەی نیو سەدە لە خەبات و قوربانیدا بەڵام بۆی هەیە هەڵدانی تۆپێک بێت بۆ ساحەی بەرامبەر، ئەمرۆ ئاواتێکی گەورەی دەوڵەتی تورکیا هاتەدی کە خودی رێبەری گشتی داوای چەکدانانی پارتەکەی دەکات بەڵام دیارنییە بیری ناسیۆنالیستی تورکی ئامادەگی ئاشتەواییەکی درێژخایەنی تێدایە؟
قۆناغی نوێی رۆژهەڵاتی ناوەڕاست پێویستی بە کاڵکردنەوەی جیاوازییە نەتەوایەتی و ئایدیۆلۆجییەکان هەیە تاوەکو  هەموو گەلانی ئەم ناوچەیە بتوانن پێشوازی لە داهاتوویەکی باشتر لە ئێستا بکەن و لانیکەم رێگری لە کوشتن و ئاوارەبوونی زیاتر بکرێت.

 لەوبارەیەوە دەستپێشخەرییەکەی بەڕێز ئۆجەلان سەرەتای ئەو زەمینەیەیە کە ئاسان نییە رق و کینەی سەدان ساڵەی نێوان ئەم گەلانەی ناوچەکە وابەخێرایی دابمرکێتەوە، لە هەریەکێک لەو جوگرافیانەدا کە کێشەی خاکمان هەیە، کورد ئامادەیی بۆ هاوبەشی لە بەڕێوەبردن و بەرزکردنەوەی ئاڵای پێکەوە ژیان هەڵکردووە، لەبەرئەوە بەرپرسیاریەتی شکەستی ئەم قۆناغە   لەمڕۆ بەدواوە لە ئەستۆی سەرکردەی گەلانی تری ناوچەکە دەبێت. 

عیراق زەرەری نەکردووە  لەچوارچێوەی دەستوردا مامەڵە لەگەڵ هەرێمی کوردستان بکات، لە 2003وە ئێستاشی لەگەڵدابێت کورد فاکتەرێکی گرنگی ئاشتەواییە بۆ عیراق، بەهەمان شێوە بۆ هەموو پارچەکانی تر راستە بەمەرجێک بەرنامەیان هەبێت بۆ سڕینەوەی بیری رەگەزپەرستی و گەشەپێدانی ئاشتەوایی و دیموکراسی.