ئاساییە شێروان شێروانی لە زیندان بمێنێتەوە

شێروان شێروانی رۆژنامەنووس کە شەش ساڵە زیندانە، لە یادی رۆژنامەگەری کوردی لە ٢٢ ی نیسان، داوای " مۆڵەتی خێزانی "و گواستنەوەی بۆ " زیندانەکانی سلێمانی" کرد، تا لەوێ ماوەی حوکمەکەی تەواو بکات، هەردوو داواکە لەلایەن دەسەڵاتدارانەوە رەتکرانەوە.

- بۆ هەردوو لایەنی پارتی و یەکێتی ئاساییە، هاوڵاتی ئەم هەرێمە لەسەر ئازادی بیرورا، وەک شێروان شێروانی لە زینداندا بێت، لە کاتێکدا لە هەڵبژاردنی پەرلەمانی کوردستاندا لە ساڵی ٢٠٢٤دا لە ٧٢٪ خەڵک بچن بۆ دەنگدان، بەڵام ماوەی زیاتر لە ساڵ و نیوێکە دەنگی خەڵکیان خستۆتە ژێر پێیانەوە، نە پەرلەمان کارادەکەن و نە حکومەتیش پێکدەهێنن، هەرچی دەزگا و دەستەی ئەم هەرێمە هەیە لە ( سەرۆکی هەرێم تا پارێزگارەکانیش ئێکسپایەربوون).

- پارتی و یەکێتی ئاساییە کە لە میرنشینەکانی دوو سەدەی رابردووی کوردستان خراپتر دژایەتی یەکتری بکەن و دەستێکەڵاو بکەن لەگەڵ سەفەوی و عوسمانی تازەدا بۆ ئێسک شکاندنی یەکتر و بەفیڕۆدانی یەک سەدە لە تێکۆشانی خەڵکی کوردستان.

- بۆ ئێوە ئاساییە وەک دوو حاکمی رەهای هەولێر و سلێمانی، خۆتان بکوژوبڕی سیاسی و ئەمنی و ئابوری ناوچەکانی خۆتان بن، کەی ویستان شەڕ لەناو شارو شارۆچەکاندا هەڵبگیرسێنن، هەر کاتێکیش ویستتان باوەش بۆ دوژمنانی خەڵکی کوردستاندا بکەنەوە.

- بۆ ئێوە ئاساییە، ترەمپ پێتان بڵێت" چەکمان نارد بۆ ئۆپۆزسیۆنی ئێرانی " کەچی کوردەکان " دزیان "، ئەگەر نەتاندزیووە دەبوایە حکومەتی هەرێم، یان وەزارەتی پێشمەرگە وەڵامێکی کۆنکرێتیتان بدایەتەوە، نەوەکو پارتی بیخاتە سەر شانی یەکێتی، یەکێتیش بیخاتەوە سەرشانی پارتی، هەرچی تۆمەت و قسەی ناشیرینە بە یەکتری بڵێن، ئێ خۆ ئێوە هەر لەمەدا گەندەڵێتان نەکردووە، هەموو خەڵکی کوردستان دەزانن کە ئێوە، بنەماڵەکانتان و هەموو ئۆرگان و میدیای حزب و سێبەرەی هەتانە، لە موڵکی گشتی پارەی دەدەن و شەرمیش ناتانگرێت، بەڵام کاتێک کە گەندەڵیەکەتان دەگاتە ترەمپ وەک سەرۆکی گەورەترین وڵاتی جیهان، ئیتر لە ترسان دەکەونە سەر چۆک و یەکتر تاوانبار دەکەن، دیارە ئەو چەکانە دزراون، گەر نەدزراون فەرموون وەڵامی ترمپ بدەنەوە، یان چەکەکان بنێرنەوە.

- یەکێتی لە سلێمانی رێگا نادات بچووکترین ناڕەزایەتی و خۆپیشاندان دژی ئێران بۆ بەرگری لە ژیانی کوردانی رۆژهەڵات ئەنجامبدرێت، لە هەولێرش دژی تورکیا بچووکترین ناڕەزایەتی سەرکوت دەکرێت.

- سەرکردەکانی پارتی و یەکێتی، با بەراشکاوی بڵێین نەوەی دووەمی بنەماڵەی تاڵەبانی و بارزانی وەک دوو بنەماڵەی دیکتاتۆر، یەکێکیان لە سلێمانی و ئەودیان لە هەولێر لەسەر بورجێکی بەرزەوە حکومی کوردستان دەکەن، هیچ بەلایانەوە گرنگ نییە هاوڵاتی لەنێویشیاندا گەنج چۆن دەژی، کەس نازانێت ئێوە لە چ کەلتورێکەوە هاتوون، نە رێز لە بە تەمەن دەگرن نە لە گەنج، ئێوە تەنها باوە کوشتەی سەمان و دەسەڵاتن، خەڵکی کوردستان  لە هەڵسوکەوتی ئێوە تێناگات، هەڵسوکەوتی ئێوە نە کوردیە، نە ئەوروپی.

- ئێوە بە پێچەوانەی داوای خەڵکی کوردستانەوە هەڵسوکەوت دەکەن. لە پەلاماردانی رۆژئاوای کوردستاندا بە ملیۆنان هاوڵاتی هاتنە سەر شەقام و هاواریان دەکرد" کورد یەکە، یەکە"، بەڵام ئێوە پێکەوە هەڵناکەن و، سەرەتایترین رێزتان لەمداوایەی خەڵک نەگرت و، یەکێتان رووی لە شامەوەو ئەوی ترتان لە شیرازە.

- لە کەشێکی وەهادا ئاساییە سبەی شێروان شێروانی حوکمەکەی بۆ درێژبکرێتەوە، یان بخرێتە زیندانێکی تاکە کەسیەوە، یان نە‌هێڵن جارێکی تر رووناکی ببینێتەوە، بەڵام ئەوەی ئاسایی نابێت ئەو راستیەیە کە هەرگیز ئەم دوو بنەماڵەیە ناتوانن خۆیان بەدەر بگرن لەو نەفرەتەی رووبەڕووی هەموو دەسەڵاتێکی دیکتاتۆری بێ ویژدان و نا بەرپرس دەبێتەوە.