هاوتاکردنی مووچەى خانەنشینى سەربازى ڕاگیرا

ناوەندی هەواڵ

بەهۆى ئەو جیاوازییەى لە یاساى خانەنشینى سەربازیی لە هەرێمى کوردستان و عێراق هەیە، لەە ئێستادا هاوتاکردنی مووچەی خانەنشینی سەربازیی هەرێم راگیرا.

بڕیاربوو بۆ مووچەى مانگى حەوت بە هاوتاکراوى مووچەى خانەنشینانى هێزەکانى 70ى پێشمەرگە دابەشبکرێت، بەڵام دواى ئەوەى کێشە بۆ مووچەکانیان دروستکرا، تا ئێستاش بەفەرمى دیارى نەکراوە کەى مووچەکانیان هاوتا دەکرێت.

ئیرادە زانیویەتى لە ئێستادا بە بڕیارى ئەنجومەنى وەزیران و هاوتاکردنى مووچەى خانەنشینانى سەربازى لە هەرێمى کوردستان راگیراوە، بەهۆى ئەوەى جێبەجێکردنەکەى زیان لە مووچەى هەزاران خانەنشین دەدات.

لە زانیارییەکاندا هاتووە، ئەگەر بەهەمان یاساى خانەنشینى سەربازى عێراق مووچەى خانەنشینى سەربازى هەرێم  هاوتا بکرێت ئەوا زیان بە بەشێک لە خانەنشینان دەگات بە جۆرێک، بەشێکى زۆریان مووچەکانیان بەرێژەى 50% کەمدەبێتەوە.

پێشتریش فەتحوڵا عومەر، جێگری بەڕێوەبەری خانەنشینی پێشمەرگە ئاماژەى بەوەداوە،ئەگەر مووچەى خانەنشینی هاوتا بکرێت زۆرینەی دەرماڵەی پلە تایبەتەکان نامێنن و ئەوانەی مووچەکانیان لە 500 هەزار کەمترە لە هاوتاکردنی مووچە سوودمەند دەبن و ئەوانەی لە ملیۆنێک کەمتر وەردەگرن 300 هەزار دیناری دیکەیان بۆ زیاد دەکرێت.