شوێنەوارێكی مێژوویی لە كەركوك دەدۆزرێتەوە

ناوەندی هەواڵ

دەستەی گشتی شوێنەوار و كەلەپوری عێراق ڕایگەیاند، دوای لێكۆڵینەوەكانیان شوێنێكی گرنگی مێژووییان لە كەركوك دۆزیوەتەوە كە مێژووەكەی زیاترە لە چوار هەزار ساڵ.

بەپێی هەواڵی میدیا عێراقییەكان، ئەو شوێنە مێژووییە لە ناوچەی "گردی عەرەب كۆمبت" لە كەركوك دۆزراوەتەوە، بەپێی لێكۆڵینەوەكان مێژووەكەی دەگەڕێتەوە بۆ زیاتر لە چوار هەزار ساڵ لەمەوبەر، ئەمەش یارمەتیدەر دەبێت لەوەی شارەزایی زیاتر لە مێژووی ناوچەكە پەیدا بكرێت، بەتایبەت لەسەردەمی خانەدانەكان و بابلی كۆن، كە مێژووەكەی دەگەڕێتەوە بۆ هەزارەی سێیەم و دووەمی پێش زاین.

لەوبارەیەوە سوهێل تەمیمی، بەڕێوەبەری بەشی هەڵكۆڵین لە دەستەی شوێنەوار و كەلەپوری عێراق ڕایگەیاند، لەگەڵ لیژنەیەكی لێكۆڵەر چووینە شوێنەكە و بەدواداچوونمان بۆ هەڵكەندنی شوێنەوارەكە كرد.

وتیشی: لە ئەنجامی لێكۆڵینەوەكان پاشماوەی ئامرازی دروستكردنی خانوو و كورە و چەندین ئامرازی دیكەی ژیان دۆزرانەوە كە سەرجەمیان نزیكەی 100 پارچە شوێنەواری بوون و دواتریش لێكۆڵینەوە و هەڵكۆڵین بەردەوام بوون ئەو پارچانەی دۆزرانەوە بە گشتی گەیشتنە 150 پارچە شوێنەوار.