لە ڕۆژانی سەرژمێریدا هاتوچۆی دەروازەكان ئاسایی دەبێت

ناوەندی هەواڵ

لە ڕۆژانی سەرژمێری گشتیی دا لە عێراق، دەروازە سنورییەكانی هەرێمی كوردستان هاتووچۆی بازرگانی و گەشتیاری تێیاندا ئاسایی دەبێت.

كۆمەڵگای دەروازەی نێودەوڵەتی پەروێزخان بڵاوی كردەوە: لە رۆژانی 20 و 21ی ئەم مانگە، كە بەهۆی سەرژمێرییەوە قەدەغەی هاتووچۆ رادەگەیەندرێت، بەڵام جوڵەی بازرگانی و گەشتیاری لە هەردوو دەروازەی پەروێزخان و باشماخ ئاسایی دەبێت.

لە ڕاگەیەندراوەكەدا هاتووە: ئاگاداری هاووڵاتیان دەكەینەوە ڕۆژانی چوارشەممە و پێنجشەممە، جوڵەی بازرگانی و گەشتیاری لە دەروازەكەوە ئاسایی دەبێت و سەرجەم بنكەكانی ناو دەروازەكە لە ئەركدا دەبن بۆ راییكردنی مامەڵەی هاووڵاتیان.

بەپێی ڕاگەیەندراوەكەی كۆمەڵگای دەروازەی نێودەوڵەتی پەروێزخان لە رۆژانی 20 و 21 و ڕۆژانی دوایی، هاتووچۆ لە دەروازەكە ئاسایی دەبێت و سەرجەم فەرمانگەكان لە ئەركدا دەبن بۆ خزمەتی هاووڵاتیان.

بەپێی رێنماییەكانی وەزارەتی ناوخۆی هەرێمی كوردستان لە كاتژمێر 12ی شەوی 19 لەسەر 20 تا كاتژمێر 12ی شەوی 21 لەسەر 22ی تشرینی دووەم قەدەغەی هاتوچۆ ڕادەگەیەندرێت.