بڕیارى لێخۆشبوون بۆ قەرزى بچووک دەرکرا

ناوەندی هەواڵ

بۆ سوودمەندبووانى قەرزى بچووک وەزارەتى دارایى و ئابووریی هەرێمى کوردستان رێنمایى بۆ لێخۆشبوونى 20% دەرکرد.

بە پێى ئەو ئامارانەى راگەیەندراوە، لە کوردستان هەشت هەزار و 136 كەس لە پێدانی قەرزی بچووك سوودمەند بوون، لە یەک ملیۆن تا 15 ملیۆن دینار قەرزیان لە حكومەتى هەرێمى کوردستان بۆ كردنەوەی پڕۆژەی بچووك وەرگرتووە.

ئارام ئەنوەر، بەڕێوەبەرى قەرزى بچوک لە وەزارەتى کارو کاروبارى کۆمەڵایەتى دەڵێت، لە ئەنجوومەنى وەزیران بڕیاردرا سوودمەندانی قەرزی بچووک بە رێژەی 20% لێخۆشبوونیان بۆ بکرێت،  لەسەر داواکاریى سوودمەندانى قەرزى بچووک  و راپۆرتى هەڵسەنگاندنى بەدواداچوونى پشتیوانى لاوان.

بەوتەى بەڕێوەبەرى قەرزى بچووک دواى بڕیارەکەى ئەنجوومەنى وەزیران، وەزارەتى دارایى راسپێردرا بۆ ئەوەى رێنمایى بۆ دەربکات، دانەوەى قەرزەکەش لە ماوەى شەش مانگ یان بەیەک گوژمە، یان بە شەش گوژمەى یەکسان بگەڕێندرێتەوە.