سەرژمێریی دانیشتووان لە عێراق و هەرێمی کوردستان دەستی پێ کرد

ناوەندی هەواڵ

کاتژمێر 07:00ی بەیانی ئەمڕۆ چوارشەممە، 20-11-2024، قۆناغی یەکەمی پرۆسەی سەرژمێریی دانیشتووان لە عێراق و هەرێمی کوردستان دەستی پێ کرد و تا سبەینێ پێنجشەممە، 21-11-2024 بەردەوام دەبێت. 

لە پرۆسەی سەرژمێریی گشتیدا، زیاتر لە 130 هەزار بژمێر بەشدار دەبن و 77 پرسیاری تایبەت بە ژیان و گوزەرانی هاووڵاتییان دەکەن.

سەرژمێریی لە هەر وڵاتێک گرنگی و تایبەتمەندی خۆی هەیە بەو پێیەی لە ڕێگەیەوە دەتوانرێت توانای مرۆیی خەڵک و توانای ماددی و ئاستی خزمەتگوزارییە گشتییەکان بۆ دابینکردنی ژیانێکی باشتر بۆ هاووڵاتییان دیاری بکرێت و حکوومەتیش بەرچاوڕوون بێت لە دارشتنەوەی پلانی ئابووری و سیاسی و مرۆیی. 

لەم سەرژمێرییە کە ئەمڕۆ دەستی پێ کردووە، فۆرمێکی ئەلیکترۆنی هەیە کە لە ڕێگەی تابلێتەوە پڕ دەکرێتەوە، کۆمەڵیک خانە لەخۆ دەگرێت وەک ناوی خۆت و کەسوکار و خێزان و هەتا دوای.

ڕۆژی سێشەممە، 19-11-2024، محەممەد شییاع سوودانی، سەرۆک وەزیرانی فیدراڵی وتارێکی لەبارەی پرۆسەی سەرژمێریی گشتی لە عێراق و هەرێمی کوردستان پێشکەش کرد و داوای لە هاووڵاتییان کرد هاوکاریی تیمەکانی سەرژمێریی بکەن، پابەندی قەدەغەی هاتوچۆ بن، زانیاریی دروست بدەن و گوێ لە دەنگۆ ناڕاستەکان نەگرن. 

سەرۆک وەزیرانی عێراق باسی لەوەش کرد "سەرژمێری پایەی گەشەپێدان و پێشکەوتن و پێشکەوتنی کارگێڕی و خزمەتگوزارییە و پەیوەندی بە بابەتەکانی پەیوەست بە باج یان بیمەی کۆمەڵایەتی نییە."