ئەمڕۆ شاندی دەم پارتی سەردانی ئیمرالی دەکاتەوە

ناوەندی هەواڵ

ئاژانسی هەواڵی میزۆپۆتامیا، لە بارەی ئەنجامدانی دووەمین دیدار لەگەڵ ڕێبەری گەلی کورد عەبدوڵا ئۆجەلان زانیاریی نوێی ئاشکرا کرد.

بەپێی زانیارییەکانی ئاژانسەکە، ئەمڕۆ، شاندی ئیمرالی دەم پارتی سەردانی ئیمرالی دەکات و لەگەڵ عەبدوڵا ئۆجەلان دیدار ئەنجام دەدەنەوە.

بەپێی هەواڵی ئاژانسەکە تا ئێستا نەزاندراوە شاندەکە لە کێ و کێ پێکدێت.

پێشتر لە 28ی کانوونی یەکەمی ساڵی ڕابردوو، هەریەک لە پەرلەمانتارانی دەم پارتی "سری سورەیا ئۆندەر و پەروین بوڵدان" سەردانی ئیمرالییان کرد و لەگەڵ ئۆجەلان دیداریان ئەنجامدا، دواتر لەسەر ڕاسپاردەی ئۆجەلان شاندەکە بە یاوەری سیاسەتمەداری کورد ئەحمەد تورک، کە قەیوومیش لە جێگەی دانراوە لە شارەوانی مێردین، سەردانی لایەنە سیاسییەکانی تورکیا و بەشێک لە زیندانییانی سیاسییان کرد.