هەسەدە ئاماری ساڵێكی شەڕی دژ بە داعشی بڵاوكردەوە

ناوەندی هەواڵ

هێزەكانی سوریای دیموكرات، ئاماری ساڵی 2024ـی شەڕی دژ بە داعشی بڵاوكردەوە، بەپێی ئامارەكە دەیان ئۆپەراسیۆن لە دژی ڕێكخراوی داعش بەرپاكراون و 17 داعش كوژراون و 278ـیان دەستگیركراون.

ئامارەكە ئەمڕۆ سێشەممە 21ـی كانونی دووەمی 2025 ناوەندی میدیایی هەسەدە بڵاویكردەوە و ئاماژە بۆ ئەوە دەكات، لە ساڵی 2024ـدا هێزەكانی سوریای دیموكرات "دەیان ئۆپەراسیۆنی سەركەوتوویان لە دژی داعش بەرپاكردووە و هێزەكانی هاوپەیمانان هاوكاریان بوون و تێكشكاندنی پێگەكانی داعشدا.

بەپێی ڕاگەیەندراوی ناوەندی میدیایی هێزەكانی سوریای دیموكرات، تەنها لە ساڵی ڕابردوودا ژمارەیەك تیرۆریست كوژراون و دەیانی تر دەستگیركراون كە بەشێكیان ئەمیر و سەركردەی داعش بوون.

ئەوانەی دەستگیركراون، وەكو هەسەدە ئاماژەی بۆ كردووە تێوەگلاون لە پێدانی زانیاریی هەواڵگری بە شانەكانی داعش و دابینكردنی چەك و پێدایستیی سەربازی و پارە بۆیان.

جگە لە كوژران و دەستگیركردنی ئەو سەركردە و چەكدارانەی داعش، هێزەكانی هەسەدە ناوچە سنوورییەكانی نێوان عێراق و سوریا و شوێنەكانی دیكەی ژێر دەسەڵاتی بەڕێوەبەرەیی خۆسەری ڕۆژئاوای كوردستان كێوماڵكردووە.

لەو بارەیەوە ڕاگەیەندراوەكە دەڵێت "ژمارەیەكی زۆری بۆمب پووچەڵكراونەتەوە و ڕێگە لە تەقینەوە و كاری تێكدەرانە گیراوە".

ئامارەكەی ناوەندی میدیایی هەسەدە:-
98 ئۆپەراسیۆن.
17 داعش كوژراون كە شەشیان سەركردە بوون.
278 داعش دەستگیركراون.
بڕێكی زۆری تەقەمەنی و ژمارەیەكی زۆری چەك و بۆمب دەستیان بەسەردا گیراوە.
داعش 113 هێرشی ئەنجامداوە.
43 هێرش تێكشكێندراون