وه‌زیرى ناوخۆ هه‌ڕه‌شه‌ له‌كارمه‌نده‌كانى ده‌كات

وه‌زاره‌تى ناوخۆ هه‌ڕه‌شه‌ له‌كارمه‌نده‌كانى ده‌كات‌و ڕایده‌گه‌یه‌نێت، "هه‌ر كارمه‌ندێكى ناوخۆ به‌شداربێت له‌بانگه‌شه‌ى هه‌ڵبژاردن، ڕاسته‌وخۆ نوسراوى گواستنه‌وه‌ى ده‌وامى بۆ ده‌كرێت بۆ سه‌ر سنوره‌كانى عێراق".

له‌و نوسراوه‌ى وه‌زاره‌تى ناوخۆى عێراق كه‌ 24ى ئه‌م مانگه‌ ده‌رچوه‌و ناوو واژۆى عەبدولئەمیر شەممەری وەزیری ناوخۆى له‌سه‌ره‌ ئاماژه‌ به‌وه‌ده‌كات، "هەر ئەفسەرێک یان کارمەندێکى ناوخۆ لەتۆڕە کۆمەڵایەتییەکان کۆمێنت بنوسێت، یان هێرشبکاتەسەر كاندیدێك، یان بەخراپە باسی بکات‌و ئامادەی گردبونەوەکانی بانگەشەی هەڵبژاردن بێت، دەستبەجێ دەگوازرێتەوە بۆ سنورەکان‌و نوسراوى بۆ ده‌كرێت".
 
وه‌كو وه‌زیرى ناوخۆى عێراق باسیكردوه‌، یەکێک لەڕێکارەکانی سزادانی کارمەندانی وەزارەتی ناوخۆی عێراق ئەوەیە کە دەگوازرێنەوە بۆسەر هێزەکانی پاسەوانیی سنورو ئەرکیان لەسنورەکانی عێراق دەبێت نه‌ك چه‌قى شاره‌كان‌و شوێنى نیشته‌جێبونى خۆیان.
 
بڕیاروایه‌ 11ى 11ى ئه‌مساڵ، هه‌ڵبژاردنى په‌رله‌مانى عێراق به‌ڕێوه‌بچێت، به‌ڵام تائێستا واده‌ى بانگه‌شه‌ دیارینه‌كراوه‌.