داتایه‌كى بازرگانیى نێوان عێراق‌و ئێران ئاشكراده‌كرێت

بەگوێرەی ئەو داتایانەی ژوری بازرگانیی هاوبەشی ئێرانی – عێراقی، هەناردەكردنی كەلوپەلی ئێرانی بۆ عێراق، لەنیوەی ساڵی 2025 بەڕێژەی 20% كەمیكردوە، یەكێك لەهۆكارەكانیش پەیوەندیی بەجەنگی 12 ڕۆژەی نێوان ئێران‌و ئیسرائیلەوە هەیە.

حامید حوسێنی ئەندامی ئەندامی ئەنجومەنی كارگێڕیی لەژوری بازرگانیی هاوبەشی ئێرانی – عێراقی ڕایگەیاندوە، لەنیوەی یەكەمی ئەمساڵ ئێران بەبڕی سێ ملیارو 771 ملیۆن دۆلاری ئەمریكی كەلوپەلی هەناردەی عێراق كردوە، واتە بەراورد بەساڵی ڕابردوو بڕی 771 ملیار هەناردەكردن كەمیكردوە.

ڕاشیگەیاندوە، چەند هۆكارێك بونەتە هۆی كەمبونەوەی ڕێژەی هەناردەكردن، لەوانە جەنگی 12 ڕۆژەی نێوان ئێران‌و ئیسرائیل، زیادكردنی ڕێژەی باجی گومرگ لەلایەن عێراق، قەدەغەكردنی هاوردەكردنی ئاسن لەبەشێك لەمەرزەكان، هەروەها بەڕێوەچونی مەراسیمەكانی چلەی ماتەمینی.

سەبارەت بەقەبارەی هەناردەی عێراقیش بۆ ئێران بۆ ئەمساڵ تائێستا زانیاری بڵاونەكراوەتەوە، بەڵام پارساڵ (2024) عێراق بەبڕی 580 ملیۆن دۆلار كەلوپەلی هەناردەی ئێران كردبوو.

بەگوێرەی ئەو زانیارییانەی فەرزاد پیلەتەن نوێنەری تایبەتی بازرگانیی کۆماری ئیسلامیی ئێران بۆ کاروباری عێراق بڵاویكردوه‌تەوە، ئەو كەلوپەلانەی لەعێراقەوە هاوردەی ئێران كراون بریتیبونە لەبەردی کانزایی، کانزای گرانبەها، بەرهەمی پۆلیمێری، کەلوپەلی کارەبایی‌و کەلوپەلی ناوماڵ.