توركیا پەیوەندییەكانی لەگەڵ ئیسرائیل پچڕاندو عه‌لى قه‌ره‌داغیش هاته‌ده‌نگ

وەك كاردانەوەیەك لەدژی ئیسرائیل، توركیا ڕێو شوێنی نوێی دەستپێكردو چەند بڕیارێكی لەناكاوی دەركرد، د.عەلی قەرەداغی سەرۆكی یەكێتیی جیهانیی زانایانی موسڵمانیش هاته‌ده‌نگ‌و په‌یامێك ئاراسته‌ى ئه‌ردۆغان ده‌كات.

هاكان فیدان وەزیری دەرەوەی توركیا لەلێدوانێكی بەپەلەدا ڕایگەیاند، وڵاتەكەی بڕیاریداوە بەتەواوی پەیوەندییە ئابوریی‌و بازرگانییەكانی لەگەڵ ئیسرائیل بپچڕێنێت، هەروەها ئاشكراشیكرد، كە ئاسمانی وڵاته‌كه‌ى بەڕوی فڕۆكەكانی ئیسرائیلدا دادەخات.

ئەو بڕیارە كاردانەوەیەكی توندی توركیایە بەرامبەر بەسیاسەتەكانی ئیسرائیل لەناوچەكەو بەتایبەت لەغەززە، كە ماوەیەكە پەیوەندییەكانی نێوان هەردوو وڵات گرژیی زۆری تێكەوتوە، چاوەڕواندەكرێت ئەم هەنگاوە كاریگەرییەكی بەرچاوی لەسەر پەیوەندییە دیپلۆماسی‌و ئابورییەكانی ناوچەكە هەبێت.

لاى خۆیشیه‌وه‌ د.عەلی قەرەداغی سەرۆكی یەكێتیی جیهانیی زانایانی موسڵمان لەبەیاننامەیەكدا نوسیویه‌تى، "سوپاس‌و پێزانینی قوڵمان هەیە بۆ سەرۆك ئەردۆغان، بۆ پچڕاندنی هەموو پەیوەندییەك لەگەڵ ئیسرائیل".

ده‌شڵێت:"ستایشی ئەو بڕیارە مێژوییەی كۆماری توركیا دەكەین بۆ پچڕاندنی هەموو پەیوەندییەك‌و داخستنی ئاسمانی وڵاتەكەی بەڕوی قەوارەی زایۆنی، ئەمە بڕیارێكی مێژوییە".

جه‌ختیكردوه‌ته‌وه‌، "سوپاسی پێزانینی خۆمان ئاراستەی سەرۆك ئەردۆغان دەكەین بۆ ئەو هەڵوێستە شەرەفمەندانەیە".

داواشیكردوه‌، "سەرجەم وڵاتە عەرەبی‌و  ئیسلامییەكان چاو لەتوركیا بكەن‌و هەموو پەیوەندییەكانیان لەگەڵ قەوارەی زایۆنی بپچڕێنن".