ئیسرائیل په‌ناگه‌ى دروزه‌كانی سوریا.. په‌یامێك بۆ بڕیار به‌ده‌ستدانی جیهان

سه‌رۆك وه‌زیرانی ئیسرائیل سه‌ردانی باكووری وڵاته‌كه‌ی ده‌كات‌و له‌گه‌ڵ سه‌رۆكی ڕوحی دروزه‌كان كۆده‌بێته‌وه‌و باس له‌دوایین هێرشه‌كانی وڵاته‌كه‌ی بۆ سه‌ر سوریا ده‌كات.

بنیامین ناتانیاهۆ سه‌رۆك وه‌زیرانی ئیسرائیل سه‌ردانی گوندی جولسی له‌باكوری وڵاته‌كه‌ی كردو له‌گه‌ڵ شێخ مۆفه‌ق ته‌ریف سه‌رۆكی ڕوحی دروزه‌كان كۆبوه‌وه‌و به‌گوێره‌ی ڕاپۆرته‌كان ناتانیاهۆ وتویه‌تی، كه‌سێك ساویلكه‌ نییه‌و به‌ئاسانی فێڵی لێبكریت، بۆیه‌ ده‌زانێت چ كاتێك بڕیارده‌دات‌و چ كارێك ده‌كات‌و ڕوبه‌ڕوی كێ‌و چ شتێك ده‌بنه‌وه‌، بۆیه‌ شه‌وی ڕابردوو هێرشیانكرده‌وه‌ سه‌ر دیمه‌شق‌و ئامانجێكی نوێیان پێكا.

میدیاكان باس له‌وه‌ ده‌كه‌ن، ناتانیاهۆ به‌شێكی كۆبونه‌وه‌كه‌ی تایبه‌ت كردوه‌ به‌دۆخی دروزه‌كان به‌گشتیی‌و دروزه‌كانی پارێزگای سوه‌یدا له‌سوریاو ڕوداوه‌كانی ئه‌مدواییه‌، زیاتر له‌هه‌زار كوژراوو برینداری لێكه‌وته‌وه‌.

وتوشیه‌تی، "ده‌یانه‌وێ ڕوداوه‌كانی سوه‌یدا بگه‌یه‌ننه‌ بڕیاربه‌ده‌ستانی نێوده‌وڵه‌تی".

ناتانیاهۆ ئاماژه‌ی به‌وه‌شكردوه‌، دانوستانه‌ ئه‌منییه‌كانیان له‌گه‌ڵ سوریا هه‌نگاوی باشیان بڕیوه‌و ئامانجیش كه‌مكردنه‌وه‌ی گرژییه‌كانی سه‌ر سنوره‌كانی نێوانیانه‌.

جه‌ختیشیكرده‌وه‌، ده‌نگی دروزه‌كان ده‌گه‌یه‌ننه‌ ناوه‌نده‌ نێوده‌وڵه‌تییه‌كان. 

چوارشەممە 27ـی ئابی 2025، ڕامی عەبدولرەحمان بەڕێوەبەری ڕوانگەی سوری بۆ مافەکانی مرۆڤ ڕایگه‌یاند، سێ فڕۆکەی جەنگی هێزی ئاسمانی ئیسرائیل 11جار چەند پێگەیەکی سەربازیان لەدەوروبەری دیمەشق بۆردومانکرد.

ئاماژەى به‌وه‌شدا، لەکاتی هێرشەکەدا ئەحمەد شەرع سەرۆکی سوریا لەئاهەنگی کردنەوەی پێشانگەی دیمەشق بوو، کە ئەو شوێنانەی هێزە ئاسمانییەکانی ئیسرائیل بۆردومانی کردون نزیکەی 10 کیلۆمەتر لەپێشانگەکە دوربوە.

ڕۆژى 25ی ئابی 2025، حیكمه‌ت هیجری یه‌كێك له‌شێخه‌ باڵاكانی دروزه‌كانی سوریا له‌كۆبونه‌وه‌یه‌كدا كه‌ له‌ماڵه‌كه‌ی خۆی له‌پارێزگای سوه‌یدا بۆ یه‌كخستنی ڕیزه‌كانیان‌و كۆبوونه‌وه‌یان به‌ده‌وری پاسه‌وانی نیشتمانیی دروه‌زه‌كان ڕایگه‌یاند، ڕێگاكه‌یان به‌ناونیشانێكی نوێ له‌دوای ڕوداوه‌كانی ئه‌مدواییانه‌ی پارێزگاكه‌یان كه‌ بوه‌ هۆی كوشتوبڕی دروزه‌كان، ده‌ستپێكردوه‌.

وتوشیه‌تی، ڕێگه‌ نوێیه‌كه‌یان تاقیكردنه‌وه‌یه‌كی دیكه‌یه‌ بۆ گه‌یشتن به‌ئامانجه‌ گه‌وره‌كه‌یان.

حیكمه‌ت هیجری هه‌روه‌ها داوای له‌وڵاتان‌و سه‌ركرده‌ سیاسییه‌كانی جیهان كرد‌، پشتیوانیان بكه‌ن بۆ دامه‌زراندنی هه‌رێمێكی سه‌ربه‌خۆی تایبه‌ت به‌دروزه‌كان له‌باشوری سوریا.

ڕامی عه‌بدولڕه‌حمان به‌ڕێوه‌به‌ری ڕوانگەی سوری بۆ مافەکانی مرۆڤ ڕایگه‌یاند، ژمارەی کوژراوانی توندوتیژییەکانی پارێزگای سوه‌یدا لەباشوری سوریا له‌ 13ی ته‌مموزه‌وه‌ تاوه‌كو 20ی هه‌مان مانگ، هەزارو 677 کەس بوه‌، كه‌ 452یان به‌ئاشكرا له‌لایه‌ن هێزه‌كانی سه‌ر به‌وەزارەتەکانی بەرگریی‌و ناوخۆی سوریا لەسێدارەدراون‌و له‌و ژماره‌یه‌شدا 43ـیان ئافره‌ت و 14ـیشان منداڵ و پیربون.