هەسەدە: ئەم بەیانییە هێزەكانمان كەوتنە بەر هێرشى دیمەشق

ناوەندی ڕاگەیاندنی هێزەکانی سوریای دیموکرات (هه‌سه‌ده‌) بڵاویکردەوە، به‌یانی ئه‌مڕۆ گروپه‌ چه‌كداره‌كانی سه‌ر به‌ حكومه‌تی دیمه‌شق له‌ ده‌وروبه‌ری روباری فورات هێرشیانكردۆ‌ته‌ سه‌ر هێزه‌كانیان، ئه‌وه‌ش له‌كاتێكدایه‌ ئه‌و گروپه‌ی سه‌ر به‌ حكومه‌تی سوریان؛ سه‌رقاڵی قاچاغچێتی بون.

ناوەندی ڕاگەیاندنی هێزەکانی سوریای دیموکرات (هه‌سه‌ده‌) له‌ ڕاگه‌یاندراوێكدا باسی له‌وه‌كردوه‌، كاتژمێر 9ى به‌یانی ئه‌مڕۆ یه‌كشه‌ممه‌، هێزەکانیان کە لە کەناری ڕوباری فورات، لە نزیک پردی ئەلئەشارە لە شارۆچکەی دەرناج لە ڕۆژهەڵاتی لادێی دێرەزور جێگیركرابون، کەوتنە بەر هێرشی ڕاستەوخۆی گروپە چەکدارەکانی سەر بە حکومەتی دیمەشق، هاوكات هێرشەکە لە کاتێکدا ڕویداوە کە گروپه‌كانی سه‌ر به‌ دیمەشق سه‌رقاڵی كارى قاچاغچێتی بون بۆ ئه‌ودیوی ڕوباره‌كه‌.

هەر لە راگەیاندراوەكەى "هەسەدە" دا هاتوە، هێزەکانمان دەستیانکردوە بە گرتنەبەری ڕێوشوێنی مەیدانی پێویست بۆ ڕوبەڕوبونەوەی هێرشەکە، ئەمەش لە كاتێكدایە پێشهاتەکان تا کاتی ئامادەکردنی ئەم بەیاننامەیە هێشتا بەردەوامن.

هاوكات هەسەدە ئاماژەى بەوەشداوە كە ئەوان لە هێزەکانی سوریای دیموکرات، پابەندبونیان بە پاراستنی ئاسایش و سەقامگیریی ناوچەکانیان دوپاتدەکەنەوەو جەختیش لەسەر بەرپرسیارێتی تەواوی حکومەتی دیمەشق دەکەنەوە بۆ ئەم ئامانجگرتنەو ئەو توخمانەی کە پەردەپۆشى ئۆپەراسیۆنەکانی قاچاغچێتی دەکەن؛ تا سەقامگیریی ناوچەکە تێکبدەن.