هه‌ر كه‌س كارتى ده‌نگدان بكڕێته‌وه‌ چى به‌سه‌ر دێت؟

كۆمسیۆنی باڵای هه‌ڵبژاردنه‌كانی عێراق ڕایگه‌یاند، لیژنه‌ی تایبه‌تیان پێكهێناوه‌ بۆ به‌دواداچونی سكاڵاكان‌و سزادانی ئه‌و كه‌س‌و كاندیدانه‌ی كارتی ده‌نگدان ده‌كڕنه‌وه‌.

نه‌براس ئه‌بو سۆده‌ جێگری وته‌بێژی كۆمسیۆنى باڵاى هه‌ڵبژاردنه‌كانى عێراق ئاشكرایكرد، كڕینی كارت به‌تاوانی هه‌ڵبژاردن داده‌نرێت‌و سزای یاسایی تایبه‌تی له‌یاسای هه‌ڵبژاردنه‌كاندا هه‌یه‌.

وتیشى، "كۆمسیۆن لیژنه‌ی چاودێریی پێكهێناوه‌ بۆ به‌دواداچونی ئه‌و جۆره‌ حاڵه‌تانه‌، هه‌روه‌ها هه‌ر سكاڵایه‌كی په‌یوه‌ندیدار به‌هه‌ر پێشێلكاریی یان تاوانێكی هه‌ڵبژاردن بكرێت".

ئه‌بو سۆده‌ جه‌ختیكرده‌وه‌، "مافی هه‌موو ئه‌وكه‌سانه‌ وه‌رده‌گیرێت كه‌ له‌مجۆره‌ تاوانانه‌ به‌شدارن، به‌و مانایه‌ی ڕێكاری یاسایی ده‌گیرێته‌به‌ر دژی هه‌ر كه‌سێک کە به‌شداریی له‌م تاوانەدا بکات، یان هه‌ر یه‌كێک له‌و تاوانانه‌ی له‌یاسا كاریگه‌ره‌كانی هه‌ڵبژاردنه‌كاندا هاتوه‌".

‌به‌وته‌ى ئه‌بو سۆده‌، "دوای سه‌لماندنی تاوانه‌كه‌ به‌به‌ڵگه‌ی حاشاهه‌ڵنه‌گر، كۆمسیۆن كه‌سی كاندید دورده‌خاته‌وه‌و دواتر كاندیده‌كه‌ به‌هۆی پێشێلكارییه‌كه‌یه‌وه‌‌ ڕه‌وانه‌ی دادگا ده‌كرێت بۆ گرتنه‌به‌ری ڕێككاری یاسایی به‌رامبه‌ری".