هۆشداریی لەکارەساتێكى مرۆیی له‌عێراق دەدرێت

سەنتەری ستراتیژی بۆ مافەکانی مرۆڤ لەعێراق هۆشداریدا لەکارەساتێکی مرۆیی لەعێراق ئەویش بەهۆی کەمئاویەوەیە.

سەنتەره‌كه‌ ڕاگەیەندراوێکی بڵاوکردوه‌ته‌وه‌و نوسیویه‌تى، "عێراق بەهۆی قەیرانی کەمئاویی‌و ئەو کێشانەی کاریگەریی کردوەتەسەر ژێرخان‌و هاوڵاتییان کە بەبێ چارەسەرکردن مانەتەوە، لەبەردەم کارەساتێکی مرۆییدایە".

ئاماژە بەوەشکراوە، دوبارەبونەوەی ڕوداوە دڵتەزێنەکانی وەک ئاگرکەوتنەوە لەنەخۆشخانەو بازاڕەکان، قەیرانەکانی ژینگەو کەشوهەوا، تەندروستی، شوێنی حەوانەوەو ژیانێکی شایستە، مەترسیی ڕاستەوخۆ بۆ سەر مافە سەرەتاییەکانی مرۆڤ هەیە.

جەختیشیکردەوە، کاردانەوەی لاوازی حکومەت‌و پلانی خۆپارێزی نابەجێ، بەشدارە لەمەترسی خستنەسەر ژیانی هەزاران هاوڵاتی.

سەنتەرەکە، داوای لەحکومەتی عێراق‌و په‌رله‌مان‌و لایەنە پەیوەندیدارەکان کردوە، ستراتیژییەکی نیشتمانی گشتگیر بۆ ڕوبەڕووبونەوەی کاریگەرییەکانی وشکەساڵی‌و ڕوبەڕوبوونەوەی مەترسییە پێشبینیکراوەکان دابڕێژن، هاوکات بەشداریکردنی ڕێکخراوەکانی کۆمەڵگەی مەدەنی‌و ڕێکخراوەکانی مافی مرۆڤ، لەچاودێریکردنی ئەنجامدان‌و جێبەجێکردنی چارەسەرەکان.

سەنتەری ستراتیژی بۆ مافەکانی مرۆڤ لەعێراق، داوای لەکۆمەڵگەی نێودەوڵەتی کردوە پاڵپشتی عێراق بکات لەڕوبەڕوبونەوەی گۆڕانی کەشوهەوا، هەروەها داوای لەدەوڵەتان کردوه‌ ڕێز لەپشکی ئاو بگرن، بەگوێره‌ى یاسا نێودەوڵەتییەکان، بۆ پاراستنی ئاشتی مەدەنی‌و مافی ملیۆنان عێراقی کە بەهۆی تینوێتی‌و ئاوارەبونی زۆرەملێیەوە مەترسییان لەسەرە.