وەزیری دەرەوەی ئەمریکا لە ئیسرائیلە

ناوەندی هەواڵ

مارکۆ روبیۆ، وەزیری دەرەوەی ئەمریکا لە یەکەم وێستگەی سەردانەکەیدا بۆ رۆژهەڵاتی ناوەڕاست گەیشتە ئیسرائیل و بڕیارە سەردانی سعودیە و ئیماراتیش بکات .

بڕیارە ئەمڕۆ 16ی شوبات، مارکۆ روبیۆ، لە قودس (ئورشەلیم) لەگەڵ سەرکردەکانی ئیسرائیل، لەپێش هەمووشیانەوە لەگەڵ بنیامین نەتانیاهوو، سەرۆکوەزیرانی ئیسرائیل کۆبێتەوە و قۆناغی دووەمی ئاگربەست و پێشنیازەکەی دۆناڵد ترەمپ، سەرۆکی ئەمریکا بۆ کەرتی غەززە تاوتوێ بکەن.

بەر لە سەردانەکەی وەزیری دەرەوەی ئەمریکا  بۆ ئیسرائیل، بنیامین نەتانیاهوو، سەرۆکوەزیرانی ئیسرائیل "پشتیوانیی رەها"ی دۆناڵد ترەمپی لە بڕیارەکانی وڵاتەکەی، سەبارەت بە کەرتی غەززە بەرز نرخاند.

بڕیارە وەزیری دەرەوەی ئەمریکا لە میانەی دانوستانەکانیدا لە گەڵ سەرکردەکانی ئیسرائیل، باس لە قۆناغی دووەمی رێککەوتنی ئاگربەست بکات.

سەرچاوەیەکی نزیک لە دانوستانەکانەوە بە ئاژانسی هەواڵی "فڕانس پرێس"ی راگەیاندووە، پێدەچێت دانوستانەکان لەسەر قۆناغی دووەم هەفتەی داهاتوو لە دەوحەی پایتەختی قەتەڕ دەستپێبکەنەوە، کە تایبەتە بە ئازادکردنی سەرجەم بارمتەکانی ئیسرائیل و کشانەوەی تەواوەتی ئیسرائیل لە کەرتی غەززە.