فەرمانبەران و مامۆستایانى ناڕازیى چالاكییەكى نوێ ئەنجامدەدەن

پاش خۆپیشاندانە بەرفراوانەكەى ئەمڕۆى موچەخۆران و دەستەى مامۆستایانى ناڕازیى و حزب و لایەنەكانى دەرەوەى یەكێتى و پارتى، دەستەی مامۆستایان و فەرمانبەرانی ناڕازیی لە كۆنگرەیەكى رۆژنامەوانیى دا كە زۆربەى كەناڵ و دەزگاكانى راگەیاندن ئامادەى بون، ئاماژەیان بەوەدا لە داهاتویەكى نزیك دا لە رێى چالاكییەوە كۆمەڵێك گەنج  و موچەخۆرو  کوڕ و کچی کوردستان، خۆبەخشانە لە شارەكانى هەرێمى کوردستانەوە بەپێ بەرەو بەغدا دەکەونە ڕێ و خامی سپی ده‌پۆشن.

دەستەكە لەو كۆنگرە رۆژنامەوانییەدا ئەوەى خستۆتەڕو كە لەمەودوا چالاكییەكانیان جیاواز و جۆراوجۆر دەكەن بۆ ئەوەی کۆتایی بە مەرگەسات و تراژیدیاى كارەساتى بێ موچەیی بهێنرێت.

هەر لەو كۆنگرە رۆژنامەوانییەدا كە پەیامنێرو مایكى ئیرادە تێیدا ئامادەبون، مامۆستایان و فەرمانبەرانی ناڕازیی ئەوەیان ڕاگەیاند؛ كە دەسەڵاتە ناشەرعییەکەی هەرێم دەستی گرتوە بەسەر سامانی سەر زەوی و ژێر زەوی كوردستان دا، تەنانەت موچەی فەرمانبەرانی وەک بارمتە گرتوە لە پێناو کۆمپانیاکانی بنەماڵەدا، هاوكات داواى ئەوەشیانكرد كە پێویستە بەناوی حکومەتی هەرێمەوە ڕێزی ئەو ڕێککەوتننامەیە بگیرێت کە خۆی واژۆی کردوەو داهاتی نەوتی و نانەوتیی بدرێتە بەغدا و کۆتایی بەم مەرگەساتە بهێنرێت.

بەپێى زانیارییەكانى پەیامنێرى ئیرادە كە لەناو خۆپیشاندانەكەدا بوە، لەرێى چالاكییەكەوە كە لە 40 ساڵى رابردودا لە كوردستان عێراقیشدا وێنەى نەبوە، ژمارەیەك لە موچەخۆرو گەنج و خۆبەخش و کوڕ و کچی کوردستان، لە شارەكانى هەرێمەوە بەپێ بەرەو بەغدا دەکەونە ڕێ و خامی سپی ده‌پۆشن، چونكە هەم حکومەتی عێراقیش یاری بە چارەنوسی ئەم میللەتە دەکات وهەم حكومەتە بێباكەكەى هەرێم گوێ لە ئازارو مەینەتییەكانى موچەخۆران ناگرێت.

جێى ئاماژەیە زیاتر لە 12 ساڵە دەسەڵاتە ناشەرعى و شكستخواردوەكەى پارتى و حكومەتى هەرێم یارى بە قوتى ژیانى هاوڵاتییانى هەرێم دەكەن و سەرەڕاى داهێنانى زاراوەكانى پاشەكەوت، خۆگونجاندن، چارەكە موچە، نیوە موچە، و لەتە موچە، لە ئێستادا موچەى فەرمانبەرانى هەرێمیان كردوە بە وەرزە موچە و بەمەش زاراوەیەكى ترى نەبیستراو چوە فەرهەنگى حكومەتە بێباك و شكستخواردوەكەى بەناو هەرێمى كوردستان.